هلمند کې د غواوو د يوه فارم مالک خپل محصولات پر خلکو وړيا وېشي

لښکرګاه (پژواک، ۵ سلواغه ۱۴۰۰): د هلمند په مرکز لښکرګاه کې د حاجي سردارولي په نوم يو کس چې د غواوو يو فارم لري، خپل محصولات په وړيا ډول پر بېوزلو خلکو وېشي.

حاجي سردارولي پژواک ته وويل چې له تېرو لسو کلونو راهیسي د غواوو فارم لري او هره ورځ پر خلکو په منځني ډول ۱۳۵ کيلو شيدې وړيا وېشي.

نوموړي زياته کړه چې په فارم کې يې د بېلابېلو هېوادونو نسل غواوې ساتلې او د هېواد له ګوټ ګوټ څخه مينه وال راځي او له ده څخه يې پر پيسو اخلي.

دی وايي، په فارم کې يې تر پنځوس زياتې غواګانې دي او هر کال په همدې شمېر پلوري او پر ځای يې له همدې غواوو زېږېدلې رسېدلې سخوندرې د خپل فارم لپاره انتخابوي.

هغه وايي، د فارم اصلي عايد يې د غواوو د پېر او پلور له لارې دی او دا چې د لبنياتو لپاره يې په لښکرګاه کې د پروسس معياري مرکز شتون نه لري، نو ده لازمه ګڼلې چې خپل لبنيات خلکو ته وړيا ورکړي.

دی وايي، له غزني، کندوز، کابل او ډېری نورو ولايتونو خلک د ده فارم ته ورځي او غواګانې ترې اخلي.

دی له حکومته غواړي چې د لبنياتو د پروسس او د غواوو د روزنې، پالنې او خوړو په برخه کې مرسته ورسره وکړي.

د لښکرګاه د کارېز سيمې یوه اوسېدونکي نظرمحمد پژواک خبري اژانس ته وویل چې د حاجي سردارولي د غواوو فارم د ده کور ته نږدې دی او د دوی په شمول ډېری کليوال له دغه فارمه سلګونه کيلوګرامه لبنيات په وړيا توګه ترلاسه کوي.

د بست کلا اوسېدونکي عطامحمد هم  پژواک ته وويل چې هر مازديګر د کلي غریب خلک د سردار ولي فارم مخې ته راټولېږي او وړيا لبنيات ترلاسه کوي.

بلخوا د هلمند د کرني او مالدارۍ رياست مرسیتال مولوي حمید د غواوو د فارم لرونکو ستونزې مني.

خو زياتوي چې دوی هڅه کوي چې په مرکز کې د لبنياتو د پروسس لپاره يو معياري مرکز جوړ کړي.

نوموړی وايي چې يادو فارمونو کې به غواوو ته معياري خواړه هم برابر کړي.

هلمند کې د غواوو لسګونه شخصي فارمونه شتون لرې او محصولات يې هم تر ډېره په هلمند کې مصرفېږي.