کابل (پژواک، ۸ وږی ۱۴۰۵): د دولتي شرکتونو عمومي ریاست وایي، د افغان پوسټ دولتي شرکت درې کسیز پلاوی د اسیا د پوستي ټولنې (APPU) په څوارلسم کانګرس او د اجرائیوي رییسانو په عمومي غونډه کې د ګډون په موخه تایلنډ ته تللی.
د دولتي شرکتونو عمومي ریاست تېره شپه ناوخته (شنبه) پر خپله اېکسپاڼه په خپره کړې خبرپاڼه کې ویلي چې دغه پلاوی د افغان پوسټ دولتي شرکت د اجرائیوي رییس مولوي رحمتالله مکي په مشرۍ تایلنډ ته روان شوی دی.
د خبرپاڼې له مخې، ټاکل شوې دغه کانګرس او غونډه د تایلنډ په پلازمېنه بنکاک کې ترسره شي او د اسیا د پوستي ټولنې د ۳۲ غړو هېوادونو د پوستي ادارو استازي، د نړیوالې پوستي اتحادیې (UPU)، د ګمرکونو نړیوال سازمان (WCO)، د ملکي هوايي چلند نړیوال سازمان (ICAO) او د یو شمېر نورو اړوندو پوستي ادارو او نړیوالو بنسټونو استازي پکې ګډون وکړي.
سرچینې لیکلي چې په دغو غونډو کې به د بېلابېلو موضوعاتو، له هغې ډلې د پوستي خدمتونو د پراختیا او معیاري کولو، د نړیوالو پوستي همکاریو د پیاوړتیا، د پوستي ادارو ترمنځ د تجربو او مسلکي وړتیاوو د تبادلې، د پوستي او ګمرکي چارو د همغږۍ او د پوستي خدمتونو د کیفیت د لوړولو په اړه خبرې وشي.
د دولتي شرکتونو عمومي ریاست زیاته کړې چې د افغان پوسټ پلاوی به په دغو غونډو کې د افغانستان د پوستي سکټور اړوند تجربې او لیدلوري شریک کړي او د نړیوالو پوستي ادارو له استازو سره به د همکاریو د پراختیا، د نړیوالو پوستي اړیکو د پیاوړتیا او د مسلکي تجربو د تبادلې په اړه خبرې وکړي.
د یادونې وړ ده چې د اسیا د پوستي اتحادیې (APPU) څوارلسم کانګرس او د دې اتحادیې د اجرائیوي رئیسانو عمومي غونډه د ۲۰۲۶ کال د اګسټ له ۳۱مې د سپټمبر تر ۴مې پورې د تایلنډ په بانکوک ښار کې ترسره کېږي.
