غور کې پر شري او خوارځواکۍ اخته ۷۲ ماشومان مړه شوي

فیروزکوه (پژواک، ۲۱ سلواغه ۱۴۰۰): د غور ولایتي روغتون مسوولین په دغه ولایت کې پر شري ناروغۍ د ۲۱۰۰ ماشومانو د اخته کېدو خبر ورکوي او وايي، له دې ډلې ۷۲ ماشومانو ساه ورکړې ده.

د غور ولایتي روغتون رئیس ډاکتر عبدالحمید نوري پژواک خبري اژانس ته وویل: «هغه ماشومان چې د شري پر ساري ناروغۍ اخته وو او د غور ولایت په کچه یې مراجعه کړې، ټول دوه زره او ۱۵۴ کسان وو، چې له دې ډلې ۲۱۰۴ کسان روغ شوي، ۴۹ کسانو د شري له امله ساه ورکړې، ۲۳ نور ماشومان تر درملنه لاندې ديِ؛ د خوارځواکۍ برخه کې ۵۰۸ ناروغانو مراجعه کړې، له دې ډلې ۴۸۵ کسان روغ شوي او له بده‌مرغه ۲۳ کسان مړه شوي او ۱۳ کسان تر درملنه لاندې ده.»

د غور د ولایتي روغتون مسوولین وايي، د دغه ولایت روغتون له ډېرو ستونزو لکه د بستر، درملو، بشري سرچینو او روغتیايي امکاناتو له کمښت سره مخ دی.

نوري وايي، د یادو ستونزو له امله مجبور دي چې هر بستر کې درې تر څلور ناروغان تر درملنې لاندې راولي.

نوموړی وايي: «یوازې د غور ولایتي روغتون د دغه ولایت د زرګونو اوسېدونکو لپاره خدمات وړاندې کوي او ټول لوی عملیاتونه او ناروغۍ په همدې روغتون کې تر درملنه لاندې نیول کېږي چې له بده‌مرغه د امکاناتو له کمښت سره مخ یو، هڅه کوو چې ټولو خلکو ته غوره خدمات وړاندې کړو.»

نوموړی زیاتوي، هره ورځ له ۱۰۰ تر ۵۰۰ ناروغانو دغه روغتون ته مراجعه کوي او دوی نه شي کولی، په کم پرسونل سره ټولو ناروغانو ته رسېدنه وکړي.

له بلې‌خوا، د ناروغانو یو شمېر پایوازانو چې غور ولایتي روغتون ته یې مراجعه کړې وايي، څو میاشتې د ناروغانو د ښه کېدو لپاره انتظار باسي، خو د بې‌کیفیته درملو له امله ناروغان نه ورسره ښه کېږي.

په غور ولایتي روغتون کې پر شري ناروغۍ د اخته ماشوم پایوازه ماه‌ګل وايي: «درې میاشتې وشوې چې دلته راغلې یم، ډاکتران رسېدنه کوي، روغتون کې درمل بې‌کیفیته دي، ډاکتران چې هر څومره کار کوي، نتیجه نه ورکوي؛ هېڅ نشته چې ناروغان مو پرې ښه شي، ځای نشته، تاسو ګورئ چې یوه چپرکټ کې درې ناروغان او پایوازان دي.»

د غور ولایتي روغتون کې د قمر په نوم د یوه ناروغ بل پایوازه وايي: «زما ماشوم چې کله وزېږېد همداسې کمزوری و؛ کور کې مو هم څه نه لرل؛ ډوډۍ او چای مو خوړل؛ د ماشوم وضعیت مې خراب شو؛ روغتون ته مې راوړ؛ دا دی تاسو یې خپله وضعیت ګورئ چې څه ډول دی، موږ چې ۲۱ شپې کېږي دلته یو؛ یوه چپرکټ کې دوه ناروغان یو؛ ښه ځای نه دی خو مجبور یو.»

د غور ولایتي روغتون د ماشومانو برخې مسوول محمدموسی هم وايي چې د چپرکټو، برېښنا، پرسونل او درملو د کمښت له امله یو شمېر ماشومان ساه ورکړې ده.

نوموړی وايي: «د غور ولایتي روغتون ډېرې ستونزې لري؛ هره ورځ یوازې د ماشومانو برخې ته له ۱۰۰ تر ۱۸۰ ماشومانو مراجعه کوي او بستر کېږي، ډاکتران کم دي، په یوه ډاکتر او څو نرسانو نه‌کېږي چې ټولو ناروغانو ته رسېدنه وشي؛ روغتون ته بې کیفیته درمل راوړل کیږي؛ برېښنا نشته چې اکسیجن تولید کړي او ناروغان ترې استفاده وکړي؛ همدا لامل دی چې ډېری ماشومان له بده‌مرغه مړه کېږي.»

ډاکتران او د ناروغانو پایوازان له مرکزي مسوولینو غواړي چې د دغه ولایت د خلکو د ستونزو د حل برخه کې جدي پاملرنه وکړي او د دغه ولایت روغتون ته باکیفیته درمل ولېږي؛ دغه راز د بسترونو او ډاکترانو شمېر ډېر کړي، څو د روغتیايي خدمتونو بهیر ښه شي او د ماشومانو د مړینې مخه ونیول شي.