کابل (پژواک، ۲۶ زمری ۱۴۰۵): له پولیو د پاک افغانستان ادارې اعلان کړی چې نن د هېواد په پنځو ولایتونو کې د ماشومانو د ګوزڼ ناروغۍ پر وړاندې د واکسین کمپاین پیلېږي.
له پولیو د پاک افغانستان ادارې له خوا خپره شوې خبرپاڼه کې راغلي چې په دغه کمپاین کې ننګرهار، کونړ، کابل، هرات او فراه ولایتونه شامل دي.
سرچینې زیاته کړې چې د پولیو واکسین کمپاین به د ننګرهار په ټولو ۲۲ ولسوالیو، د کونړ په اوو، د کابل په شپږو، د هرات په دوو او د فراه په دوو ولسوالیو کې ترسره شي.
یادې ادارې ویلي چې د دغه کمپاین موخه د پولیو ناروغۍ وروستیو مثبتو پېښو ته چټک غبرګون ښودل او د ویروس د لا خپرېدو مخنیوی دی.
خواجه نصیراحمد صدیقی
