<p style="text-align: justify;">ګردېز (پژواک، د کب لومړۍ نېټه ١٤٠٠): د پکتیا پوهنتون د یو شمېر پوهنځیو استادانو د افغانستان د بانکي زېرمې په اړه د جوبايډن ناسمه پرېکړه وغندله او د کنګل شويو پيسو د خلاصولو غوښتنه يې وکړه.</p>
<p style="text-align: justify;">دغه څرګندونې د پکتيا پوهنتون استادانو د کب په لومړۍ نېټه د يوې خبري غونډې پرمهال وکړې.</p>
<p style="text-align: justify;">د پکتيا پوهنتون ریيس پوهنمل عبيدالله اخندزاده وويل، کنګل شوې شتمني ددولت نه، بلکې د ټولوافغانانو ده او کنګل کول يې د افغانستان له ولس سره خيانت دى.</p>
<p style="text-align: justify;">نوموړي وويل:((موږ عدالت غواړو، د امریکا له خوا د افغان ولس دکنګل شویو پیسو غلا کول او په خپل سر تصرف په کې کول د يوه هېواد او ملت ترټولو انساني او اخلاقي ټیټوالی ښيي.))</p>
<p style="text-align: justify;">دده په خبره، ټول افغانان د دې پيسو غوښتنونکي دي او پر نړيواله ټولنه او د بشر حقونو پر ادارو غږ کوو چې دوى دې هم د افغانانو د غوښتنې ملاتړ وکړي.</p>
<p style="text-align: justify;">د پکتيا پوهنتون د اقتصاد پوهنځي استاد دولت خان جوهر وويل: ((کله چې د افغانستان پيسې کنګل شوې له هغې راهيسې د افغانیو ارزښت هم ټیټ شوى او که چيرې دغه پيسې خلاصې نه شي نو پر افغانيو به نور هم منفي اثر وکړي.))</p>
<p style="text-align: justify;">ده وويل، دا هغه پيسې دي چې په تېرو شلو کلونو کې د افغانستان له ملي بودجې څخه ځانګړې کېدې تر څو د افغانيو ارزښت لوړ وساتي.</p>
<p style="text-align: justify;">دا په داسې حال کې ده چې د امریکا ولسمشر جو بایډن د سلواغې په ۲۲مه د یادې شتمنۍ وېشلو اجرايي فرمان صادر کړ؛ د دغه فرمان له مخې، په امریکا کې د افغانستان د مرکزي بانک ۷ میلیارد ډالره کنګل شوې شتمني پر دوو مساوي برخو وېشل شوې ده.</p>
<p style="text-align: justify;">د فرمان له مخې، ټاکل شوې د دغو پیسو نیمه برخه (۳ اعشاریه ۵ میلیارډ ډالر) افغانستان ته د بشردوستانه مرستو لپاره ورکړل شي او پاتې نورې د دې لپاره په امریکا کې ساتل کېږي چې د ۲۰۰۱ کال د سپټمبر ۱۱مې د بریدونو د ځینو قربانیانو کورونیو ته یې د غرامت په ډول د ورکړې قضیه روانه ده.</p>
<p style="text-align: justify;">دغه فرمان د افغانانو له سختو غبرګونونه سره مخ شوی، وایي یاده پانګه د دوی ده او امریکا حق نه لري چې دغه پیسې په غرامت کې ورکړي.</p>
<p style="text-align: justify;">خو سپېنې ماڼۍ ویلي وه چې د افغانستان د شتمنیو په اړه د بایډن پرېکړه به د محکمې تر حکم وروسته پلې شي.</p>
