کابل (پژواک، ۲۳ تله ۱۴۰۵): د افغانستان د سوداګرۍ او پانګونې خونه وایي چې د دې خونې د ټولنیزو او فرهنګي چارو د مرستیال په مشرۍ د افغان سوداګرو ۵۰ کسیز پلاوی په یوه نړۍوال سوداګریز نندارتون کې د ګډون په موخه اندونیزیا ته تللی دی.
د افغانستان د سوداګرۍ او پانګونې خونې نن په یوه خبرپاڼه کې ویلي چې یاد پلاوی د دې خونې د ټولنیزو او فرهنګي چارو د مرستیال مولوي حبیبالله عمر په مشرۍ د انډونیزیا پلازمېنې جاکارتا ښار ته رسېدلی، څو د دغه هېواد په نړۍوال نندارتون کې ګډون وکړي.
یادې خونې زیاته کړې چې دغه سفر د افغانستان د سوداګریزو محصولاتو او د پانګونې فرصتونو معرفي کولو، د سیمهییزو او نړۍوالو بازارونو په اړه د معلوماتو د تبادلې او د دواړو هېوادونو د خصوصي سکټورونو ترمنځ د همکاریو پیاوړتیا لپاره د مناسبو لارو چارو موندلو په موخه ترسره کېږي.
سرچینې زیاته کړې، ټاکل شوې د افغانستان د سوداګرۍ او پانګونې خونې پلاوی به د نندارتون په څنډه کې له اندونیزیایي سوداګرو او پانګهوالو سره هم لیدنې وکړي.
د سوداګرۍ خونه وايي چې په دغو لیدنو کې به د خونې استازي په افغانستان کې د شته سوداګرۍ او پانګونې برخو فرصتونه، د بېلابېلو اقتصادي سکټورونو ظرفیتونه او د سوداګریزو همکاریو د پراختیا زمینې معرفي کړي او اندونیزیایي سوداګر او پانګهوال به وهڅوي، څو په افغانستان کې پانګونه وکړي او ګډ سوداګریز فعالیتونه پیل کړي.
د سرچېنې په خبره، همدارنګه دغه لیدنې کولای شي د دواړو هېوادونو د سوداګریزو بنسټونو ترمنځ د اړیکو په پیاوړتیا، د سوداګریزو معلوماتو او تجربو په تبادله، د ګډو پانګونو د فرصتونو په پېژندنه او د افغان سوداګرو لپاره د نویو بازارونو په موندلو کې مهم رول ولوبوي.
