ناروې له افغانستان سره نږدې لس میلیون ډالره مرسته کوي

کابل(پژواک، ۲کب ۱۴۰۰): د ناروې حکومت وایي چې له افغانستان سره د بشردوستانه مرستو په لړ کې نږدې لس میلیون ډالره مرسته کوي.

د ناروې د بهرنیو چارو وزارت وایي چې په افغانستان کې بشري وضعیت د اندېښنې وړ دی، نو ځکه دوی د خپلو مرستو کچه زیاتوي.

د ناروې د بهرنیو چارو وزیرې آنیکن هویتفلډ ویلي : «دغه ملاتړ د ناروې د بشردوستانه سازمانونو له لارې ترسره کوو.»

هغه زیاته کړې: «موږ باید په افغانستان کې د روغتیایي او ښوونیز نظام له شړېدو مخنیوی وکړو، باید د کورنیو د ژوند ملاتړ وکړو، دا کولی شي د هغو کسانو شمېر چې بشردوستانه مرستو ته اړتیا لري کم کړي، په همدې دلیل ناروې د روغتیا او پوهنې په برخو کې خپلو مرستو ته دوام ورکوي.»

د ناروې د بهرنیو چارو وزیرې ویلي چې له دغو پیسو به د نورو برخو تر څنګ له ماشومانو څخه د ملاتړ په برخه کې هم ګټه واخیستل شي.

سرچینې ویلي چې دوی به د افغانستان له ملکي وګړو سره خپلو مرستو ته د ناروې د کډوالو ادارې، د ناروې د سره صلیب، د ناروې د ماشومانو د ژغورنې بنسټ له لارې دوام ورکړي.

د سرچینې په خبره، ناروې به ۸۶ میلیون نارویجي اضافي کرون چې (نهه میلیون او نږدې اووه سوه زره امریکاي ډالر کیږي) په افغانستان کې د بشردوستانه مرستو په برخو کې ولګوي.

دا په داسې حال کې ده چې ملګرو ملتونو مخکې ویلي و چې په افغانستان کې ۲۴میلیون وګړي د خوراکي توکو له سخت کمښت سره مخ دي او باید نړیوال د مرستو په برخه کې ونډه واخلي.

ناروې له دې مخکې هم په ځینو برخو کې له اړو کورنیو او دغه راز په ښوونیزه برخو کې له افغانستان سره مرستې کړي دي.

دغه راز ناروې شاوخوا یوه میاشت مخکې د افغانستان حکومت د بهرنیو چارو وزارت د سرپرست مولوي امیرخان متقي په مشرۍ یوه ۱۵کسیز پلاوي ته بلنه ورکړې وه چې ناروې ته لاړ شي

متقی د یو پلاوي په مشرۍ ناروې ته په درې ورځني سفر ولاړ او هلته یې د حکومت د مسوولینو ترڅنګ د افغانستان له مدني فعالانو، د اروپایي ټولنې او امریکا له استازو سره وکتل.