امریکا د افغانستان پر سوداګريزو او اقتصادي فعالیتونو بندیزونه لرې کړل

کابل (پژواک، ۷ کب ۱۴۰۰): د امریکا متحده ایالتونو مالیې وزارت په افغانستان کې د سوداګریزو او مالي معاملاتو ته د پراختیا ورکولو لپاره جواز صادر کړی چې له حکومتي ادارو سره راکړه ورکړه هم په کې شامله ده.

د دغه هېواد د مالیې وزارت د بهرنیو پانګو د کنټرول ادارې پرون په یوه خبرپاڼه کې ویلي، دغه جواز د دې لپاره صادر شوی چې د افغانستان پر سرپرست حکومت باندې د امریکا بندیزونه د هغو معاملو او فعالیتونه مخه ونه نیسي چې افغانانو ته د بشري مرستو رسولو لپاره اړتیا ده.

په خبرپاڼه کې د امریکا د مالیې وزارت د مرستیال اډیمو له قوله راغلي: "امریکا افغانستان ته د بشري مرستو جاري ساتلو، تجارتي او مالي فعالیتونو کې د اسانتیاوو برابرولو په دوامداره بڼې ضروري ګامونه اخلي. زموږ نننۍ کړنه له دې امله ده چې په افغانستان کې روان اقتصادي بحران ته په کتو سره هغو اندېښنو ته توجه وکړو چې بندیزونه یې د تجارتي او مالي فعالیتونو پر وړاندې رامنځته کوي او په عین وخت کې طالبانو، د حقاني شبکې او نورو نا مطلوبو کسانو لاس ته د مالي سرچینو د لوېدو مخه ونیسو."

د امریکا د بهرنیو چارو وزیر انټوني بلینکن د یاد جواز له صادرېدو وروسته په خپل ټويټر لیکلي، دغه جواز په افغانستان کې پراخو تجارتي فعالیتونو ته اسانتیا برابروي چې ګټه به یې افغانانو ته وي.

ده وویل: "په دې جواز کې واضح شوې ده چې مالي ادارې، نادولتي موسسې، نړیوالې موسسې او د خصوصي سکټور شرکتونه پر طالبانو باندې د امریکا د بندیزونو په رعایتولو سره په بېلابېلو برخو کې معاملې او مالي فعالیتونه ترسره کولای شي. په دغو معاملو او مالي فعالیتونو کې خصوصي او سوداګریزه بانکداري، د زیربناوو پراختیا او ساتنه، تجارتي راکړه ورکړه، د ترانسپورټي سیستمونو د خوندیتوب او د حفظ او مراقبت عملیات او د مخابراتو او معلوماتو په برخو کې معاملې شاملې دي."

هغه زیاته کړه، صادر شوی جواز د هغو خصوصي شرکتونو او موسسو فعالیتونو ته اسانتیا برابروي چې د افغانستان له دولتي ادارو سره کار کوي، د ګمرک محصول، مالیه او نور فیسونه ورکوي. په دغو دولتي ادارو کې هغه ادارې هم شاملې دي چې مشران یې د امریکا په بندیزونو کې شامل کسان دي.

د یادونې ده، د امریکا مالیې وزارت له دغه جواز مخکې ملګرو ملتونو د امنیت شورا د ۲۶۱۵ پرېکړه لیک د تحقق لپاره چې د ۲۰۲۱ کال د ډسمبر په میاشت کې صادر شو، په افغانستان پورې اړوند شپږ نور جوازونه هم صادر کړي چې افغانستان ته د اړینو بشري مرستو لپاره اسانتیاوې رامنځته کوي.