په هلمند کې پر خوارځواکۍ د پنځو اخته ماشومانو پلار له حکومت او خيريه بنسټونو مرسته غواړي

لښکرګاه (پژواک، ۲۴ وری ۱۴۰۱): د هلمند په ناوې ولسوالۍ کې یو پلار چې پنځه اولادونه یې پر خوارځواکۍ اخته دي، له حکومت او خیریه بنسټونو د مرستې غوښتنه کوي.

مولوي عبدالظاهر چې د یاد ولایت د ناوې ولسوالۍ په خرابي سيمه کې د يوه جومات امام دی، پنځه اولادونه يې په داسې حال کې پر خوارځواکۍ اخته شوي چې درې ماشومان یې یو ځايي زېږېدلي دي.

ده له پژواک سره په ځانګړې مرکه کې وويل چې له يوې خوا يې اقتصادي وضعیت خراب دی او له بلې  پنځه اولادونه یې پر خوارځواکۍ اخته شوي.

هغه وويل: “تېر کال مې درې اولادونه په روغتون کې له وخت مخکې وزېږېدل؛ لس مياشتې وروسته مې دوه نور غبرګ ماشومان هم پيدا شول او اوس ټول پر خوارځواکۍ اخته دي.”

دا په داسې حال کې ده چې د هلمند مرکز لښکرګاه په بست او ملکې ثريا روغتونونو کې د خوارځواکۍ د وړيا درملنې څانګې فعالې دي.

عبدالظاهر وايي، يادو روغتونونو ته يې مراجعه کړې؛ خو دی څوک نه لري چې له ماشومانو سره په روغتون کې بستر شي.

ده وويل: “ما هم د بست او هم ملکې ثريا روغتون ته مراجعه کړې او هلته ډاکټرانو راته وويل چې ماشومان دې بستر کړه او وړيا درملنه يې کوو؛ خو زه پایواز نه لرم چې له ماشومانو سره بستر شي، نو ځکه مې د ډاکټرانو خبره ونه منله.”

ده زياته کړه چې اوس يې پنځه واړه ماشومان هم د شېدو له کمښت سره مخ دي او هم اکسیجن ته اړتيا لري، خو دی یې د برابرولو وس نه لري.

دی وايي، يوه ډبه اکسیجن يې په ۲۵۰۰ افغانۍ رانيولې؛ خو د شېدو د پېرلو وس نه لري.

ده وويل: “زه د يوه واړه کلي امام یم، د عايد بله سرچينه نه لرم، خو د کور او ناروغو ماشومانو لګښت مې زيات دی.”

مولوي عبدالظاهر زیاتوي، که څوک راسره مرسته ونه کړي کېدای شي ماشومان له لاسه ورکړم.

 په سيمه کې د یوې د یني مدرسې استاد حافظ نقیب الله هم پژواک ته وویل: “دغه دیني عالم په بد اقتصادي وضعیت کې دی او حکومت او ملي سوداګر باید مرسته ورسره وکړي.”

بل خوا د هلمند چارواکي وايي چې حکومت به د ياد کس پوښتنه وکړي او که مستحق و، نو مرسته به ورسره وشي.

 د هلمند د اطلاعاتو او کلتور ریاست مرستیال مولوي محمد قاسم ریاض پژواک ته وویل: “اسلامي امارت د هېواد د ټولو اړمنو لاسنیوي لپاره هڅې کوي، څو بېړنیو مرستو ته اړ کسان په نښه شي او مرستې ورسره وکړي.”

 هغه زیاته کړه، حکومت پخوا هم له غریبو کورنیو سره مرستې کړې دي او اوس هم د دوام هڅه کوي.

Views: 322