کندوز ښار (پژواک، ۱۷ غویی ۱۴۰۱): په کندوز ولایت کې د اختر په ورځو کې د څو جلا ترافیکي پېښو له امله ۱۱ کسان مړه او ۸۰ تنه نور ټپیان شوي دي.
د کندوز د عامې روغتیا رییس ډاکټر نجیب الله ساحل پژواک خبري اژانس ته وویل، د اختر په ورځو کې د ترافیکي پېښو له امله ۱۱ مړي او ۸۰ ټپیان روغتون ته وروړل شوي دي.
هغه وایي، په ټپیانو کې ښځې او ماشومان هم شامل دي؛ او ډېرې دغه پېښې په امام صاحب ولسوالۍ کې رامنځ ته شوې دي.
ده له ټولو موټر چلوونکو وغوښتل چې ترافیکي اصول دې مراعت کړي.
دغه راز عبدالمحفوظ چې پلار یې د اختر په لومړۍ ورځ یوه ترافیکي پېښه کې ټپي شوی پژواک ته وویل: «پلار مې د اختر په لومړۍ ورځ د اختر لمانځه ته روان و چې یوه بې پلېټه موټر هغه وواهه او اوسمهال په روغتون کې بستر دی؛ موږ د اختر په ورځو پوه نشو، له دولته غواړو چې بې اسناده موټر او له جواز پرته موټر چلوونکي دې ونیسي.»
له بلې خوا، د کندوز د امنیه قوماندانۍ ویاند قاري عبیدالله عابدي وایي، څوک چې له جواز پرته موټر چلوي نو ورسره قانوني چلند کېږي.
هغه زیاته کړه: «له بده مرغه په کندوز کې د اختر په ورځو کې څو ترافیکي پېښې وشوې چې تلفات یې هم لرل؛ امنیه قومانداني په دې اړه جدي ده، هغه موټر چلوونکي چې له جواز پرته ډرېوري کوي، موږ یې مخه نیسو.»
دا په داسې حال کې ده چې په ځینو واټونو کې د ترافیکي نښو نشتون، د لارو نه معیاري والی، د موټر چلوونکو له خوا د ترافیکي قوانینو نه مراعاتول او ورځ تر بلې د نقلیه وسایطو زیاتېدل په هېواد کې د ترافیکي پېښو اساسي عوامل ګڼل کېږي.
Views: 32
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن