زابل کې ترافیکي پېښه؛ شپږو کسانو ته مرګ ژوبله اوښتې ده

کلات (پژواک، د غبرګولي لومړۍ نېټه ۱۴۰۱): د زابل په مرکز کلات کې د یوې ترافیکي پېښې له امله څلور کسان مړه او دوه نور ټپيان شوي دي.

د زابل د ترافیکو مدیر ملا احمدالله نافذ پژواک خبري اژانس ته وویل، پېښه نن سهار د کلات اړوند د جلدک په هزارتک سیمه کې د کرولا او مازدا موټرو ترمنځ د ټکر له امله شوې ده.

هغه زیاته کړه: «له سپرلیو ډک کرولا موټر له کندهاره زابل ته پر لاره و چې د کلات اړوند د جلدک په هزارتک سیمه کې یې له بار وړونکي مازدا موټر سره ټکر کړی، په دې پېښه څلور کسان مړه شوي، دوه نور ټپيان دي.»

د ده په خبره، د پېښې ټپيان او مړي د زابل ولایتي روغتون ته وړل شوي دي.

نوموړي وویل، د دې پېښې چې د لومړیو معلوماتو له مخې، د چلوونکو د بې احتیاطۍ له امله شوې، څېړنه کوي.

هغه زیاته کړه چې په دې پېښه کې له ملامت پېژندونکو سره به قانوني چلند وکړي.

د زابل ولایتي روغتون سرطبیب، ډاکټر نذیراحمد حریفال پژواک خبري اژانس ته وویل، د پېښې له ځایه د یوې ښځې په ګډون څلور مړي او دوه ټپیان ور وړل شوي دي.

دی وايي، د ټپیانو درملنه پیل شوې او روغتیايي حالت یې د ډاډ وړ دی.

د کابل- کندهار لار- چې له زابله تېرېږي- د تېرو جګړو او بار وړونکو موټرو د درنو بارونو له امله خرابه شوې چې وخت ناوخت پرې دغه ډول پېښې رامنځته کېږي.