د ملګرو ملتونو د کډوالو چارو اداره: داخلي بې‌ځایه شوو او راستنېدونکو کډوالو ته سم چاپیریال برابروو

کابل (پژواک، ۲۴ غبرګولی ۱۴۰۱): د ملګرو ملتونو د کډوالو چارو اداره وايي، په افغانستان کې د داخلي بې‌ځايه شوو او راستنېدونکو کډوالو ته د سم چاپيريال برابرولو لپاره کار کوي او دې موخې ته د رسېدو لپاره خپل فعالیتونه او کارکوونکي ډېروي.

د بهرنيو چارو وزارت ویاند عبدالقهار بلخي پر خپل ټويټر ليکلي چې نن د ملګرو ملتونو د کډوالو ادارې مرستيالې کيلي کليمينټس د بهرنيو چارو وزارت له سياسي مرستیال شېر‌محمد عباس ستانکزي سره کتلي دي.

سرچينه ليکي، کيلي کليمينټس په دې ليدنه کې وويل چې د کډوالو چارو اداره داخلي بې‌ځايه شوو او راستنېدونکو کډوالو ته د مناسب چاپيريال رامنځته کولو برخه کې کار کوي او دغې موخې ته د رسېدو لپاره خپلې کړنې او د کارکوونکو شمېر ډېروي.

هغې زياته کړې چې د کډوالو ستونزې به کوربه هېوادونو ته د سفر پرمهال او په درې اړخيزو غونډو کې مطرح کړي.

سرچينه ليکي، ستانکزي په دې ليدنه کې ويلي چې حکومت د نورې کډوالۍ د مخنيوي او د مخکنيو کډوالو د راستنولو هوډ لري.

هغه زياته کړه: «د لسيزو جګړو، بې‌روزګارۍ، بانکي او اقتصادي بنديزونو له کبله دغه کار ډېر دروند شوى او په دې برخه کې د نړيوالو مرستې ته اړ يو.‌«

ستانکزي يادې ادارې ته د همکارۍ ډاډ ورکړ او غوښتنه یې وکړه چې دغه اداره دې د کډوالو د ستونزو په حل کې له افغانستان سره همکاري وکړي.