سرپل (پژواک، ۲۹ غبرګولی ۱۴۰۱): د سرپل ولایت مسوولین وایي، په دغه ولایت کې د تېر کال په پرتله سیاحت ډېره وده کړې ده.
د سرپل د اطلاعاتو او کلتور رییس مفتي عمیر سرپلي پژواک خبري اژانس ته وویل، د تېر کال په پرتله سږ کال له شمالي ولایتونو دغه ولایت ته د سیلانیانو ورتګ ډېر شوی دی.
هغه زیاته کړه: «موږ خپلو هېوادوالو ته ډاډ ورکوو چې په ډاډ سره د سرپل ولایت له ښکلو طبیعي منظرو لیدنه وکړي.»
هغه زياته کړه، سیاحت به د دې لامل شي څو د سرپل خلک په مستقيم او غيرمستقيم ډول عاید ولري.
سيلانيان هم په دغه ولايت کې د ګرځندوی لپاره له مناسب چاپېرياله خوښي څرګندوي.
د بلخ یوه اوسېدونکي سید یوسف چې د سرپل د سانچارک ولسوالۍ «انگشت شاه» درې ته راغلی، پژواک خبري اژانس ته یې وویل: «خوشحاله یو چې زموږ په هېواد کې امنیت ټینګ شوی او کولای شو د هېواد هرې برخې ته سفر وکړو.»
صادق د سرپل ښار اوسېدونکی چې له خپلې کورنۍ سره د سانچارک ولسوالۍ انګشت شاه درې ته راغلی، وایي، له څو کلونو راهیسې د جګړو له امله دغې درې ته نه و راغلی؛ اوس چې امنیت ټینګ شوی له خپلې کورنۍ سره یو ځای راغلی څو سیل او تفریح وکړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن