جلال اباد (پژواک، ۴ وږی ۱۴۰۱): په ختيځ کې د ملياردو چارواکي وايي، د ننګرهار او لغمان ولايتونو په بېلابېلو سيمو کې يې هغه ۳۲۱ کسان د چورلکو په وسیله ژغورلي او خوندي ځایونو ته یې لېږدولي چې په سېلابونو کې بند پاتې وو.
د چارواکو په وينا، په یادو ولایتونو کې د سختو اورښتونو له امله سېلابونه راوتلي چې خلکو ته يې ځاني او مالي زيانونه هم اړولي دي.
د ۲۰۱ خالد بن وليد قولاردو وياند مولوي وحيدالله محمدي د وږي په ۴مه پژواک اژانس ته وويل، د قول اردو قوماندان د خپل مسووليت په ساحه کې د ننګرهار د هوايي مفرزې په ګډون ټولو اړوندو لواګانو او جزوتامونو ته د تيار سئ امر کړی دی.
هغه زیاته کړه، اړوندو مسوولینو ته لارښوونه شوې چې په بېړنۍ توګه سېلابځپلو سیمو ته ځانونه ورسوي او له خلکو سره هر اړخیزه همکاري وکړي.
دی وايي، له تېرې شپې راهیسې د ننګرهار او لغمان له بېلابېلو سیمو ۳۲۱ کسان- چې په سېلابونو کې بند پاتې وو- د چورلکو په وسیله خوندي ځایونو ته لېږدول شوي دي.
نوموړي وویل: «له تېرې شپې راهیسې د قول اردو اړوندو جزوتامونو د هوايي ځواک په ملاتړ له سېلابونو څخه د خلکو د ژغورنې عمليات پيل کړي چې تر دې دمه يې په ګڼ تعداد خلک له کورني اسبابو او حيواناتو سره يو ځای ژغورلي او ياد عمليات لا هم روان دي «.
د لغمان د قرغيو ولسوالۍ او مرکز مهترلام ښار او د ننګرهار د بهسودو، کامې او مومندرې ولسواليو سربېره د جلالاباد ښار په بېلابېلو سيمو کې- چې سيند ته څېرمه پرتې دي- ډېر خلک د اوبو په منځ کې بند پاتې وو چې وژغورل شول.
د کامې ولسوالۍ يوه اوسېدونکي خدایداد پژواک ته وويل، د دې ولسوالۍ اړوند د سنګر سرای په دوبېلې سیمه کې يو شمېر ګوجر کورنۍ بندې پاتې وې چې بيا د چورلکې په وسيله وژغورل شوې.
د جلالاباد ښار يوه اوسېدونکي ميرويس هم پژواک ته وويل چې له تېرې شپې راهیسې بیا تر اوسه د کابل سیند پر سر د ملي اردو چورلکې ګرځي او خلک ژغوري.
له تېرې شاوخوا یوې میاشتې راهیسې د هېواد په بېلابېلو ولایتونو کې د سختو اورښتونو له امله د راوتلو سېلابونو په پایله کې ۱۸۲ کسان مړه، ۲۵۰ کسان ټپيان او له ۳ زره ډېر کورونه ویجاړ شوي دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن