تالقان (پژواک، ۹ وږی، ۱۴۰۱): د تخار ولایت د دشت قلعه ولسوالۍ امنیتي مسوولین وايي، په دغه ولسوالۍ کې یوې ځوانې نجلۍ له خپلې کورنۍ سره تر لفظي شخړې وروسته ځان وژنه کړې ده.
امنیتي مسوولین وايي، دغې نجلۍ لومړی د موږکانو مړه کولو درمل خوري بیا ځان په چاقو وهي او وروسته ځان ته ګاز بلوي او ځان ته اور اچوي چې له امله یې مړه کېږي.
د دشت قلعې ولسوالۍ جنايي امر جانان الدين انصار هم دغه پېښه تاييد کړه او پژواک ته يې وويل، دغه ځوانه نجلۍ «بيبي حوا» نومېده او ۱۵ کلنه وه.
د هغه په وينا، دغې نجلۍ د کورني تاوتريخوالي له امله ځان وژنه کړې ده.
انصار زیاتوي، دغه پېښه تېر ماښام (سهشنبه) رامنځته شوې او بیبی حوا روغتون ته د لېږد پر مهال مړه شوې ده.
بلخوا، مدني فعال حامد قرلق د بېکارۍ زیاتوالی، اقتصادي بېوزلي او د نجونو د ښوونځیو د دروازو تړلي پاتې کېدل، د ځان وژنو د ډېروالي اصلي لاملونه بولي او له سرپرست حکومته غواړي، څو د دې اندېښنو د هواري لپاره هڅې وکړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن