پلعلم (پژواک، ۲۷ وږی ۱۴۰۵): د لوګر امنیتي مسوولین وايي چې د دغه ولایت په محمداغه ولسوالۍ کې یو قومي مشر وژل شوی او د پېښې په تړاو درې شکمن کسان نیول شوي دي.
د لوګر د امنیې قوماندانۍ ویاند مولوي احمدالله انس پژواک ته وویل چې دغه پېښه پرون هغه مهال شوې چې حاجي ببرک احمدزي د محمداغې ولسوالۍ په برک سیمه کې په خپله کرونده کې کار کاوه.
د هغه په خبره، له پېښې وروسته د محمداغې ولسوالۍ د امنیې قوماندانۍ منسوبین د پېښې ځای ته تللي او د موضوع په اړه یې څېړنې پیل کړې دي.
انس زیاته کړه چې د لومړنیو معلوماتو له مخې، د پېښې په تړاو درې شکمن کسان نیول شوي او یوه تومانچه هم ترې ترلاسه شوې ده.
د لوګر د امنیې قوماندانۍ ویاند وايي چې د پېښې په اړه څېړنې روانې دي او د جزئیاتو له بشپړېدو وروسته به نور معلومات شریک شي.
