غزني، کلات (پژواک، ۱۷ وږی ۱۴۰۱): د ملګرو ملتونو له ماشومانو د ملاتړ صندوق/ UNICEF په غزني کې له ۱۰۰ روغتیايي مرکزونو سره د ۲۰ میلیونه افغانیو په ارزښت او د زابل له ۴۷ روغتیايي مرکزونو سره د ۶ میلیونه افغانیو په ارزښت د طبي او غېر طبي وسایلو مرسته وکړه.
په غزني کې د افغان پرمختیايي موسسې/ADA ولایتي مسوول ډاکټر سمین نیکفر پژواک خبري اژانس ته وویل، د دغه ولایت د روغتیايي مرکزونو لپاره طبي او غېر طبي وسایل د ملګرو ملتونو له ماشومانو د ملاتړ صندوق په مالي لګښت چمتو شوي چې د وېش چارې یې د دوی پر غاړه وې.
هغه زیاته کړه، د ۲۰ میلیونه افغانیو په ارزښت اخیستل شوي دا توکي د غزني پر هغو ۱۰۰ روغتیايي مرکزونو ووېشل شول چې د وسایلو له کمښت سره مخ وو.
دی وايي، په پېرل شوو وسایلو کې ۶۵۰ لمریزې هېندارې، ۱۰۱ انورټرونه، ۳۸۰ بېټرۍ، ۲۳۰ د اوبو فلټرونه، ۷۵۲ د پخلنځي کیټونه، د انستیزي او جراحي ماشینونه او نور د اړتیا وړ توکي شامل دي.
ده وویل، د غزني د مرکز او ولسوالیو روغتیايي مرکزونه د برېښنا او پاکو اوبو له نشتوالي سره مخ وو چې اوس به یې دا ستونزې حل شي.
د غزني چارواکي د ملګرو ملتونو له ماشومانو د ملاتړ صندوق څخه مننه کوي چې د دغه ولایت له روغتیايي مرکزونو سره یې د اړینو وسایلو مرسته وکړه.
د غزني والي مولوي محمداسحاق اخوندزاده وايي، له دې مرستې سره به د روغتیايي مرکزونو په خدماتو کې ښهوالی راشي.
خو ده دا مرستې کافي و نه بللې او له مرستندویه ادارو یې د نورو ورته مرستو غوښتنه هم وکړه.
د غزني اوسېدونکي هم وايي، له دې مرستې سره به د ناروغانو هغه ستونزې حل شي چې مخکې ورسره مخ وو.
د دغه ولایت د خواجه عمري ولسوالۍ یوه اوسېدونکي محمدنسیم پژواک خبري اژانس ته وویل، په سیمه کې یې روغتیايي مرکز شته خو د درملو او نورو وسایلو له کمښت سره مخ وو.
د روانې اوونۍ په اوږدو کې هم د غزني ولایتي روغتون د ماشومانو له څانګې سره د بېپولې ماشومانو بنسټ له خوا د یو میلیون افغانیو په ارزښت د طبي وسایلو مرسته شوې وه.
د یوه بل خبر له مخې، د ملګرو ملتونو له ماشومانو د ملاتړ صندوق/ UNICEF په زابل کې هم له ۴۷ روغتیايي مرکزونو سره د ۶ میلیونه افغانیو په ارزښت د طبي او غېر طبي وسایلو مرسته وکړه.
په زابل کې د افغان پرمختیايي موسسې/ADA ولایتي مسوول ډاکټر نثاراحمد جاوېد پژواک خبري اژانس ته وویل، د شاوخوا ۶ میلیونه افغانیو په ارزښت طبي او غېر طبي وسایل او تجهیزات ناروغانو ته د په وخت رسېدنې په موخه اخیستل شوي چې د دغه ولایت په مرکز او ولسوالیو کې به ۴۷ روغتیايي مرکزونو ته ورکړل شي.
دی زیاتوي، په دغو توکو کې ۲۷ قلمه طبي او ۳۸ قلمه غېر طبي توکي دي چې په کې د اکېسجن ډبې، د مور او ماشوم د ساتنې، د جراحي او داخله ناروغانو د درملنې توکي، دفتري مېزونه، څوکۍ، المارۍ، یخچالونه، فلټرونه او کولرونه شامل دي.
د ده په خبره، له دې مرستې سره به د روغتیايي مرکزونو ډېرې ستونزې حل شي.
د زابل د عامې روغتیا رییس ډاکټر عبدالحکیم حکیمي پژواک خبري اژانس ته وویل، په مرکز کلات او ولسوالیو کې ۱۰۰ ثابت او ګرځنده روغتیايي مرکزونه لري چې هره میاشت له ۱۰۰زره د ډېرو ناروغانو درملنه کوي.
هغه زیاته کړه، د ملګرو ملتونو له خوا د طبي او غېر طبي وسایلو له دې مرستې سره به روغتیايي خدمات پیاوړي او د روغتیا برخې کارکوونکو ستونزې به ورسره حل شي.
Views: 27
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن