<p style="text-align: justify;">نیلي (پژواک، ۲۶ وږی ۱۴۰۱): د دایکنډي ولایت د سنګتخت او بندر ولسوالۍ دوو ځوانانو، له ښاره کلي ته د کتاب لوستنې فرهنګ لېږد او د خلکو د پوهې کچې لوړولو په موخه، زرګونه ټوکه کتابونه راټول کړي او په دغې ولسوالۍ کې یې یو عامه کتابتون جوړ کړی دی.</p>
<p style="text-align: justify;">د دغه کتابتون یوه بنسټګرعبدالحمید مدبر وویل، دغه کتابتون د دایکنډي د سنګتخت و بندر ولسوالۍ اړوند په «بندر» کلي کې د «خاتم النبین عمومي کتابتون» په نامه جوړ شوی دی.</p>
<p style="text-align: justify;">هغه زیاته کړه، ده د یو بل ځوان په همکارۍ د تېر کال له سلواغې میاشتې راهیسې له کابل، هرات او دایکنډي ولایتونو څخه ۷زره ټوکه کتابونه راټول کړي دي.</p>
<p style="text-align: justify;">د هغه په خبره، د دوی له خوا راټول شوي کتابونه د عمومي اطلاعاتو، تاریخ، دین، فلسفې او سیاسي موضوعاتو اړوند دي چې له علمي حوزو او ځوانانو څخه د ۷ میاشتو په موده کې راټول شوي دي.</p>
<p style="text-align: justify;">له بلې خوا، ده د «خاتم النبیین عمومي کتابتون» د فعالولو موخه د سیمې اوسېدونکو لپاره د اطلاعاتو مرکز جوړول، له ښاره کلیو ته د کتابتونونو راکښل او ځوانانو او زدهکوونکو ته د مطالعې فرهنګ جووړل وبلل.</p>
<p style="text-align: justify;">نوموړي زیاته کړه، په «بندر» کلي کې - چې د دایکنډي ولایت یوه لرې پرته سیمه ده - له ۹۰زرو ډېر وګړي اوسېږي، خو له دې مخکې د خلکو د استفادې لپاره هيڅ کتابتون فعال نه و، خو اوس د دوی له دغه اقدامه خلکو هرکلی کړی دی.</p>
<p style="text-align: justify;">له بلې خوا، د یاد کتابتون بل بنسټګر، د دیني علومو څېړونکی او محصل خدابخش محمدي وویل: «د دغه کتابتون د جوړولو موخه د ځوانانو د پوهې کچې لوړول دي، څو خلک (ښځينه او نارینه) وکولای شي چې نویو اطلاعاتو ته لاسرسی ولري او له دې لارې د نوي او غوره ژوند اساس کېږدي.»</p>
<p style="text-align: justify;">ده له حکومتي مسوولینو وغوښتل چې خلکو او په ځانګړي ډول د افغانستان ځوان نسل ته د علم او پوهې زمینه برابره کړي څو ټول د بشپړې پوهې کچې ته ورسېږي او د افغانستان په ابادولو کې برخه واخلي.</p>
<p style="text-align: justify;">دغه ځوان له خلکو هم وغوښت څو د مطالعې لپاره کتابتونو نه ته لاړ شي، ځکه د هغه په خبره «پرمختګ د رسېدو یوازېنۍ لاره مطالعه ده.»</p>
<p style="text-align: justify;">و موغوښتل چې په دې اړه د دایکنډي ولایت د اطلاعاتو او فرهنګ رییس سید مصطفی صالح نظر ولرو، خو تراوسه یې له پژواک سره د خبرو لپاره مثبت ځواب نه دی ورکړی. خو له دې مخکې د دغې ادارې مسوولینو ویلي وو چې د دایکنډي ولایت په کچه ۳۰ عامه کتابوتونه شته، خو له مطالعې سره د ځوانانو د لېوالتیا کچه د قناعت وړ نه ده.</p>
