ښرنه (پژواک، ۱۸ لړم ۱۴۰۱): د پکتيکا په مرکز ښرنه کې د څه باندې څوارلس میليون افغانيو په لګښت يوه ښوونځي ته ودانۍ جوړه شوه.
د افغانستان لپاره د سویډن کمېټې د غزني سیمه يیز دفتر رئیس سلطان محمد سهاک پژواک خبري اژانس ته وويل، په ښرنه کې د سرې کلا اړوند د «تمدن» په نوم ښوونځي ته ودانۍ د افغانستان لپاره د سويډن کمېټې له لوري جوړه شوې ده.
ده زياته کړه، د دغه ښوونځي لپاره په نوې جوړه شوې ودانۍ ۱۴.۲ ميليونه افغانۍ لګښت راغلی چې شپږ درسي خونې، دوه اداري خونې، یوه کتابخونه، یو کمپیوټر لېب، یوه تحویلخانه او یوه لابراتوار خونه په کې شامل دي. دغه راز د احاطې دېوال يې ۲۷۰ متر مربع اوږدوالي لري.
د ده په وينا، یوه ژوره څاه، دولس تختې لمریزې شمسۍ، منظم برقي سیستم او لس تشنابونه هم په کې په اساسي ډول جوړ شوي دي.
بل خوا د مرکز ښرنې اوسېدونکي هم خوښ دي چې د اولادونو د روښانه راتلونکې لپاره یې دغه ډول هڅې کېږي.
د حاجي محمد خان په نوم يوه قومي مشر له پژواک اژانس سره د خبرو پر مهال وویل: ‹‹دغه ډول کارونه که هر نهاد کوي، موږ یې ستاینه کوو او له حکومت هم دا غواړو چې له موسسو سره دې په ګډه په دغسې برخو کې کارونه وکړي.»
د معلوماتو له مخې، تر دې مهاله د تمدن لومړني ښوونځي ۳۲۰ نجونو او هلکانو په غیرمعیاري ټولګیو کې زده کړې کولې، خو دغه ښوونځي ته د نوې ودانۍ له جوړېدو وروسته به په دې برخه کې د زده کوونکو ستونزې حل او په يوه خوندي چاپېریال کې به خپلو زده کړو ته دوام ورکړي.
Views: 80
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن