استاد سیاف: د پوهې او تحصیل د مخنیوي پر ځای دې په دې برخه کې اړین اصلاحات رامنځته شي

[restrict paid="true"]

اټلانټا (پژواک، د مرغومي لومړۍ نېټه ۱۴۰۱): د دعوت اسلامي ګوند مشر استاد عبدالرب الرسول سیاف د سرپرست حکومت له خوا پوهنتونونو کې د نجونو پر زده کړې د بندېز په غبرګون کې ویلي، لازمه دا وه چې د پوهې او تحصیل د مخنيوي پر ځای په دې برخه کې اړین اصلاحات رامنځته شوي وای.

نوموړي دغه څرګندونې پر خپل فیسبوک پاڼه کې وروسته له هغه کړې چې د لوړو زده کړو وزارت په یوه خبرتیا کې په ټولو دولتي او غیر دولتي پوهنتونونو کې د نجونو پر زده کړې بندېز اعلان کړ.

استاد سیاف د سرپرست حکومت چارواکو ته په خطاب کې ویلي: «شريعت تاسو ته د نجونو د زده کړې او تحصيل د مخنيوی امر نه دی کړی، بلکې د شریعت د غوښتنې په اساس تاسې مکلف ياست چی د دوی د زده کړې او تحصیل لپاره مناسبې او آبرومندانه زمینې او آسانتياوی برابرې کړې؛ ځکه يوه ټولنه ښځينه ډاکټرې، ښځينه پوليسې او ښځينه روزونکي او نورو ته اړتیا لري.»

هغه زیاته کړې، لازمه داوه چې د پوهې او تحصیل د مخنيوي پر ځای مو څه ښکلي اصلاحات رامنځته کړی وای او تر اوسني تعليمي نظام څخه مو غوره  او تر ټولو مناسبې او  آبرومندانه پراخې زمینې او آسانتياوې د دوی دزده کړو لپاره برابرې کړې وای.

استاد سیاف ویلي، اسلام د پوهې، رڼایۍ او پرمختګ او له جهل او ناپوهۍ سره د مبارزی دين دی .

د هغه په وینا، مسلمانان د خپل قوت، شان او  شوکت په وخت کې د علم او پوهې مخکښ او استادان وو او په مختلفو علومو او فنونو کې يې د مرجعيت مقام خپل کړي وو.

ده زیاته کړې: «هيله ده چې له اسلام څخه نړيوالوته بد او تور او غیرحقيقي انځور وړاندی نه کړئ؛ اسلام د رحمت، مينې او انساني کرامت د رعایت دين دی او مسلمانان بايد مبشرين (زيری ورکوونکي) واوسي، نه منفرين (ترهوونکي او ويره اچوونکي) پر خلکو ظلم او تيری مه کوئ چې پایلې یې ډيرې بدي دي.»

دغه جهادي مشر ویلي دی: «له مکتبیانو سره عقده مه ساتئ؛ هغوی ستاسو  دښمنان نه دي که تاسو د هدايې کتاب يا بخاري شریف لوستي مو دي، هغوی همدغه کتابونه د مېز په سر ايښي او لوستي دي. ډاکتر او انجنير او نور پوهان يۍ ستاسو او د ټولنې د ټولنیز ژوند په خدمت کې بوخت دی.»

د افغانستان سرپرست حکومت دغه پرېکړه د ملګرو ملتونو او اسلامي سازمان په ګډون ګڼ شمېر نړیوالو ادارو او لسګونو هېوادونو غندلی دی.

دغه راز د حکومت پخپل یو شمېر چارواکي او سیاسي مشرانو پر خواشیني څرګنده کړې او ډیریو افغانانو پر ټولنیزو شبکو کې غندلی دی.

خو د لوړو زده کړو سرپرست وزیر مولوي ندا محمد ندیم تېره شپه ناوخته ملي تلویزیون سره په یوه مرکه کې د دغې پرېکړې لاملونه په ګوته کړل.

هغه وویل، چې په تېرو ۱۴ میاشتو کې د اناثو د زده کړو په ډګر کې منکرات موجود وو او له همدې امله یې پوهنتونونو کې د زده کړو د ځنډولو پرېکړه کړې ده.

ندیم دغه راز وویل، لیلیو ته د نجونو د راتګ پر مهال د محرم نشتوالی، د حجاب سم نه عملي کول او ګډې زده کړې هغه لاملونه دي چې له امله یې پوهنتونونو کې د نجونو پر زده کړو بندېز ولګېد.

د هغه په وینا، دوی له افغان ښځو او زده کړو سره ستونزه نه لري او هر کله چې دغه ستونزې حل شي، نو د پوهنتونونو دروازې به بېرته خلاصي کړي.

[/restrict]