کابل (پژواک، ۳۰ سلواغه ۱۴۰۱): د لوړو زدهکړو وزارت علمي مرستیال لطفالله خیرخواه د پوهنتون له استادانو وغوښتل چې د یوه معیاري او کره نصاب جوړولو په برخه کې پوره هڅه وکړي.
د لوړو زدهکړو وزارت نن د سلواغې په ۳۰مه په خپله ټويټرپاڼه کې لیکلي چې د افغان نړۍوال پوهنتون او د هېواد بېلابېلو تحصیلي بنسټونو د ۲۹ څانګو د تحصیلي نصاب د بیاکتنې او پراختیا درېیم پړاو کلسټر پیل شو.
سرچینې لیکلي، د یاد کلسټر په پرانیسته کې د لوړو زدهکړو وزارت علمي مرستیال دوکتور لطفالله خیرخواه وویل: «علم په یوه ځانګړي هېواد او خاورې پورې منحصر نه دی، موږ کولای شو چې د نړۍ پرمختللو هېوادونو له نصابونو څخه په خپل نصاب کې ګټه واخلو.»
سرچینه زیاتوي، د لوړو زدهکړو وزارت علمي مرستیال نصاب د علم بنسټ او د ټولنې رهبريکوونکی وباله او د پوهنتون له ټولو استادانو یې وغوښتل چې د یوه معیاري او کره نصاب جوړولو په برخه کې پوره هڅه وکړي.
سرچینه کاږي، د لوړو زدهکړو وزارت د تحصیلي نصاب مشر مفتي عبدالرووف فراهي د یاد کلسټر په اړه معلومات ورکړل او ویې ویل، په دغه پړاو کې به د یادو څانګو تحصیلي نصاب بشپړ او د راټولېدنې، ډيزاین او صحافت چارې به یې ترسره کېږي.
سرچینې څرګنده کړه، د تحصیلي نصاب د ملي کمېسیون غړي پوهندوی داوودشاه فاروق د کلسټر د کار بڼه تشریح کړه او ګډونوالو ته یې لازمې لارښوونې وکړې.
د سرچینې د معلوماتو له مخې، په یاد کلسټر کې د لیسانس برخې د طب، ساینس، فارمسي، ویترنري، کمیپوټر ساینس او د افغان نړۍوال پوهنتون د فوق لېسانس برخې د طب، انجنیري او زراعت څانګو نصابونه شامل دي چې په دې پړاو کې به بشپړ او د تدریس په موخه به تحصیلي بنسټونو ته واستول شي.
Views: 211
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن