کندهار (پژواک، ۱۱ کب ۱۴۰۱): یو چینايي وګړی چې له څلورو کلونو راهیسې له خپلې کورنۍ سره په کندهار کې اوسېږي، بېوزلو کورنیو ته د اقتصادي ودې په موخه کوچني کاروبارونه برابروي.
هغه چې ځان ته د افتاب خان انتخاب کړی، نن (پنجشنبه) د کندهار په ارغنداب ولسوالۍ کې له ۳۰ کورنیو سره د چرګانو مرسته وکړه، څو هغوی
د چرګانو فارمونو ته پراختیا ورکړي.
په دغه مرسته کې هرې کورنۍ ته شل د هګیو چرګې او د هغو غذايي توکي ورکړل شوي دي.
افتاب وایي، دا مهال په افغانستان کې سوداګري کوي او له بهره بېلابېل توکي واردوي خو کاروبار یې په لوړه کچه نه دی.
د هغه په وینا، که څه هم دی خپله شتمن نه دی خو غواړي چې بېوزلو کورنیو ته د اقتصادي ودې په موخه کوچني کاروبارونه جوړ کړي.
نوموړي زیاته کړه: «ما له ډېره وخته پلان درلود چې داسې یو کار وکړم ترڅو له بېوزلو او اړو کورنیو سره د هغوی د اقتصاد په جوړولو کې مرسته وکړي، موږ غواړو له خلکو سره همکاري وکړو تر څو هغوی کوچني کاروبارونه وکړي، ما فکر وکړ چې زه باید ګرانبیه بوټونه او نور توکي ونه پېرم او پرځای یې له خلکو سره مرسته وکړم چې دا به زما لپاره ډېر ثواب هم وي.»
هغه پر نورو افغان سوداګرو او شتمنو کسانو هم غږ کوي چې له بېوزلو کسانو سره په بېلابېلو برخو کې د کوچنیو کاروبارونو په جوړولو کې مرسته او همکاري وکړي څو د خلکو اقتصاد ښه شي.
نوموړی وایي، له دې وړاندې يې هم له بېوزلو کورنیو سره مرستې کړې او بیا هم پلان لري چې له خپل توان سره سم له اړو خلکو سره همکاري وکړي.
په ارغنداب کې دغه بېوزلې کورنۍ د السادات خیریه بنسټ له خوا دغه چینايي سوداګر ته ورپېژندل شوي څو مرستې ورسره وشي.
د یاد بنسټ استازی عبدالرحمن وایي، هڅه یې دا ده چې نور پانګهوال او شتمن هم له بېوزلو کورنیو سره مرستو ته وهڅوي.
د ارغنداب اوسېدونکي هم له دې مرستې خوښ دي او وایي، هڅه کوي چې له دغه کوچنیو فارمونو څخه لوی فارمونه جوړ کړي او خپل اقتصاد ته وده ورکړي.
محمد اسماعیل چې د هګیو چرګې یې ترلاسه کړې وایي، دومره توان یې نه درلود چې همدا چرګې واخلي او بیا یې وساتي.
هغه زیاته کړه: «موږ ډېر لوېدلي یو، نو له دوی څخه ډېر خوشحاله یو چې دا کومک یې کړی دی.»
دغهراز نور کسان هم وایي، که دوی په خپل لګښت دغه چرګې پېرلای نو له دوی څخه له لس زره افغانیو ډېرې مصرفېدلې.
یو بل کس فیض محمد چې دغه مرسته یې تر لاسه کړې غوښتنه کوي چې نور افغان سوداګر او شتمن کسان باید بېوزلو کورنیو ته د کوچنيو کاروبارونو زمینه برابره کړي.
ده زیاته کړه: «موږ ډېر خوشحاله یو او کوښښ کوو چې د دې لږ چرګانو څخه لوی فارمونه جوړ کړو، خو نور کسان هم باید له غریبو کسانو سره د کوچنیو کاروبارونو په جوړولو کې مرسته وکړي.»
په کندهار کې دا لومړی ځل دی چې د یوه داسې بهرني پانګهوال او سوداګر له خوا د کوچنیو کاروبارونو په برخه کې له بېوزلو کسانو سره مرسته کېږي.
چینايي پانګهوال افتاب وایي، که څه هم په افغانستان کې يې د تابعیت اخیستلو هڅه کړې خو تر اوسه بریالی شوی نه دی.
