عامې روغتیا وزارت: د زلزلې له امله تر اوسه ۳ کسان مړه او ۴۴ نور ټپیان شوي

[restrict paid="true"]

دویم تعقیب- اټلانټا (پژواک، ۲ وری ۱۴۰۲ ): د عامې روغتیا وزارت وایي، د وروستیو معلوماتو له مخې، د بیګانۍ زلزلې له امله تر اوسه په ټول هېواد کې ۳ کسان مړه او ۴۴ نور ټپیان شوي دي.

د عامې روغتیا وزارت ویاند ډاکټر شرافت زمان د شپې ناوخته په ټویټر کې لیکلي، د هېواد په ۳۴ ولايتونو کې تر اوسه روغتيايي مرکزونو ته نږدې شل ټپيان او دوه جسدونه ور وړل شوي دي.

هغه زیاته کړې، د عامې روغتيا وزارت د رهبرۍ له حکم سره سم ټول روغتيايي مرکزونه او مسؤولين د خپلو هېوادوالو ژوند ژغورلو ته چمتو دي.

تر دې مخکې، د اسلامي امارت ویاند ذبیح‌الله مجاهد ویلي و، د کورنیو چارو او عامې روغتیا وزارتونو له خوا ټولو ولایتي مسوولینو ته خبر ورکړل شوی چې د زلزلې له امله د احتمالي زیانونو پر مهال له خلکو سره مرستو ته چمتووالی ونیسي.

یوې زورورې زلزلې نن (د وري په لومړۍ نېټه) ماسختن ۹:۲۰ دقیقې د هېواد شمال‌لویدیځ، مرکزي، ختیځ او سویل‌ختیځ ولایتونه ولړزول؛ دغه‌راز د زلزلې ټکانونه په پاکستان، هندوستان، تاجکستان او ازبکستان کې هم محسوس شوي دي.

د پژواک خبریالان وایي، زلزله ډېره زوروره وه او خلک ل خپلو کورونو څخه په داسې حال کې ووتل چې سخت ویرېدلي وو.

بلخوا پاکستاني رسنیو خبر ورکړی چې په دغه هېواد کې د زلزلې له امله ۱۰ کسان مړه او له سلو ډېر ټپیان شوي دي.

[/restrict]