افغان لوبغاړي راشد خان او نوراحمد یو ځل بیا د هند کرکټ سوداګریزو سیالیو کې ښه وځلېدل

[restrict paid="true"]

اټلانټا (پژواک، ۵ غویی ۱۴۰۲): د هندوستان د کرکټ په سوداګریزو سیالیو (آی‌پي‌اېل) کې افغان لوبغاړي راشد خان او نور احمد لکڼوال یو ځل بیا ښه وځلېدل.

د یادو سیالیو په لړ کې د راشد خان لوبډلې ګجرات د غویي په ۵مه، خپله اوومه لوبه له ممبۍ انډینز سره ترسره کړ. د دې لوبې پچه ممبۍ لوبډلې وګټله او لومړی یې د توپ‌اچونې پرېکړه وکړه.

د ګجرات لوبډلې په ټاکلو ۲۰ اوورونو کې د پنځو لوبغاړو په سوځېدلو ۲۰۷ منډې جوړې کړې او سیالې ډلې ته یې د ۲۰۸ منډو هدف ورکړ.

د ممبۍ لوبډلې یاد هدف ترلاسه نه شو کړای او په ۲۰ اوورونو کې د ۹ لوبغاړو په سوځېدلو یې ۱۵۲ منډې جوړې کړې او ګجرات دا لوبه د ۵۵ منډو په توپیر سره وګټله.

د ګجرات له لوري راشد خان دوه او نور احمد لکڼوال درې لوبغاړي وسوځول.

راشد خان تر اوسه د روان کال په سیالیو کې تر ټولو زیاتې ۱۴ لوبغاړي سوځولي او په جدول کې لومړی مقام  لري.

همداراز د راشد خان لوبډله ګجرات هم په اوو لوبو کې د شپږو په ګټلو سره په جدول کې دویم مقام لري.

بل افغان لوبغاړی نوین‌الحق هم تر اوسه په دې سیالیو کې ښه ځلېدلی دی. رحمن‌الله ګربز چې د کلکتې په لوبډله کې لوبېږي، تر اوسه یوازې په یوه لوبه کې ښه ځلېدلی دی.

[/restrict]