[restrict paid=”true”]
کابل (پژواک، ۱۹ غویی ۱۴۰۲): د افغانستان د صنعت او سوداګرۍ وزارت پلاوي د پاکستان د کراچۍ ښار بندرونو له عمومي رییس سره پر ټرانزیټي او سوداګریزو ستونزو خبرې وکړې.
د باختر اژانس د خبر له مخې، په دې لیدنه کې د یاد وزارت سرپرست نورالدین عزیزي، د ټرانسپورټ وزارت مرستیال، د ګمرکونو عمومي مسؤول او مل پلاوی شامل وو.
سرچینې زیاته کړې، د ناستې په پیل کې د افغانستان – پاکستان پر سوداګريزو او ټرانزیټي مسایلو هراړخیزې خبرې وشوې او وروسته د کراچۍ په بندرونو کې د افغان سوداګرو ستونزې هم تر بحث لاندې ونیول شوې.
په راپور کې راغلي، په ناسته کې افغان پلاوي د افغانستان په ګمرکونو کې پاکستاني سوداګرو ته د برابرو شوو اسانتیاوو یادونه وکړه او هیله یې څرګنده کړه چې پاکستانی لوری دې هم د افغان سوداګرو د مالونو په ټرانزیټي برخه کې اسانتیاوې برابرې کړي.
د لیدنې په پای کې دواړو لورو د سوداګرۍ او ټرانزیټ په برخو کې د یوه میکانیزم له لارې د ښو اړیکو او همغږۍ پر رامنځته کولو هوکړه وکړه.
[/restrict]
Views: 64
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن