[restrict paid=”true”]
اټلانټا (پژواک، ۳۰ غویی ۱۴۰۲): د ایران د دفاع وزارت د لوی درستیز په مشرۍ یو پلاوی کابل ته تللی او هلته یې له افغان لوري سره پر ځینو مسایلو خبرې کړې دي.
د افغانستان ملي دفاع وزارت وزارت له خوا د غویي په ۳۰مه په خپره شوې یوه خبرپاڼه کې راغلي، د ایران د وسلهوال پوځ د لوی درستیز مرستیال بهرام حسیني مطلق په مشرۍ پلاوي کابل ته د سفر پر مهال د افغانستان د وسلهوال پوځ د لوی درستیز له مرستیال حاجي ماليخان صدیق سره وکتل.
سرچینې زیاته کړې، د لوى درستيز مرستيال ايراني پلاوي ته د ښه راغلاست ترڅنګ د دواړو ګاونډیو هېوادونو ترمنځ همکارۍ او ښو اړیکو ته په اشاره وویل، اسلامي امارت تل د ایران له اسلامي جمهوریت سره د ښو اړیکو غوښتونکی و او په بېلابېلو برخو کې د لازیاتې همکارۍ لپاره ژمن دی.
په خبرپاڼه کې راغلي، په ورته مهال ايراني پلاوي په بېلابېلو برخو کې د دواړو هېوادونو ژمنې مثبتې و ارزولې او د اړيکو د لا پياوړتيا ډاډ يې ورکړ.
د ملي دفاع وزارت ویلي، په دې کتنه کې دواړو لورو د سرحدي ستونزو پر هواري، د ګډو همکاريو پر پياوړتيا او د اړوندو مراجعو له لارې د ستونزو پر حل او خبرو ټينګار وکړ.
دغه راز په دې کتنه کې د کورنيو چارو وزارت سرحدي چارواکو، د سرحدونو او قبایلو وزارت او د کرنې او اراضۍ یو شمېر مسوولینو هم حضور درلود.
ایرانی پلاوی په داسې حال کې کابل ته سفر کوي چې په دې وروستیو کې د هلمند اوبو پر سر ایراني چارواکو د افغانستان د سرپرست حکومت پر ضد تُندې څرګندونې کړې دي.
څو ورځې مخکې د ایران بهرنیو چارو وزیر د افغانستان د بهرنیو چارو وزارت له سرپرست عبدالوکیل متوکل سره د هلمند اوبو پر سر خبرې وکړې.
ورپسې د ایران ولسمشر ابراهیم رییسي په تُنده لهجه خبرداری ورکړ چې که د هلمند اوبو کې یې بشپړ حق ورنه کړی، نو بیا افغانستان د ګیلې حق نه لري.
د افغانستان سرپرست حکومت بیا په یوه اعلامیه کې د ایراني چارواکو تُندې څرګندونې رد کړې او دا یې د اړیکو د زیان په مانا وګرځولې او غوښتنه یې وکړه چې دا ډول څرګندونې بیا تکرار نه شي.
[/restrict]
Views: 109
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن