تالقان (پژواک، ۳۰ غبرګولی ۱۴۰۲): د تخار ځایي مسوولین وايي، د دغه ولایت په مرکز او رستاق ولسوالۍ کې د ۲۴ میلیون افغانیو په ارزښت د اوبو رسولو د پنځو پروژو چارې پيل شوې چې په بشپړېدو سره به یې ۱۵ زره کسان د څښاک له پاکو اوبو برخمن شي.
د تخار د کلیو بیارغونې او پراختیا رییس ملا عظمت نورمحمد وايي، د دغه ولایت په ځینو سیمو کې خلک د څښاک پاکو اوبو له کمښت سره مخ دي چې د هڅو په پایله کې، په مرکز او پنځو ولسوالیو کې د څښاک اوبو رسولو پنځو پروژو کارونه پيل شول.
هغه زیاته کړه، پر یادو پروژو ۲۴ میلیون او ۲۵۹ زره افغانۍ لګښت راځي چې د یونیسف اداې له خوا ورکول کېږي.
نوموړی وايي، د یادو پروژو په بشپړېدو سره د ښوونځيو د زدهکوونکو په ګډون، ۱۵۴۷۴ ځايي اوسېدونکو ته د څښاک پاکې اوبه برابرېږي.
د تخار د کلیو بیارغونې او پراختیا رییس همداراز وویل، د ۵ پایو کانکریټي ذخیرو، ۱۰۴۲ نلونو، د ۱۱۶ لمریزو هندارو، ۳ ژورو څاګانو، ۱۹۵۵۹ متر پایپونو او په یوه ښوونځي کې د ۶ تشنابونو جوړول د دغو پروژو اساسي کارونه دي.
نوموړي وویل، په یادو پروژو کې ۱۳۵۸۱ ځايي اوسېدونکو ته د کار زمینه هم برابرېږي.
په ورته وخت کې، یو شمېر ځايي اوسېدونکي د یادو پروژو د پلې کېدو هرکلی کوي، خو د ځمکې لاندې اوبو کچې ټیټېدو له امله اندېښنه څرګندوي.
د تالقان اوسېدونکی محمدقاسم همکار وايي، په داسې حال کې چې د ځمکې لاندې اوبو کچه ټیټه شوې، د دغه ډول پروژو په پلې کېدو سره د اوبو کمښت برخه کې د خلکو ستونزې هوارېږي.
هغه په یاد ولايت کې د ډېرو ټولګټو پروژو پر پلې کېدو ټینګار کوي.
په ورته مهال، د تخار ولایت د بشري سرچینو آمر حاجي سیدحسن صابري وایي، حکومت هڅه کوي چې له موسسو سره په همکارۍ خلکو ته عامالمنفعه پروژې پلې کړي، خو مهمه ده چې خلک په خپله د ورته پروژو څارنه وکړي او له دولت او موسسو سره همکاري وکړي.
Views: 24
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن