کندوز (پژواک،۴ تله ۱۴۰۲): د کندوز ځایي مسوولین وایي چې د دغه ولایت د درملتونونو د ارزونې په پایله کې یې موندلې چې د ۴۲۳ درملتونونو له ډلې ۲۹۵ یې له جواز پرته فعالیت کوي.
د کندوز د خوړو او درملو آمر جمعهګل شمسي پژواک ته وویل، دې ادارې پړېکړه کړې چې له دې وروسته د هغو درملتونونو له مالکانو سره قانوني چلند کوي او مخه یې نیسي چې له اسنادو پرته فعالیت کوي.
هغه زیاته کړه: «موږ په کندوز کې بشپړه بررسي وکړه؛ د هغې په پایله کې مو وموندله چې په کندوز کې ۴۲۳ درملتونونه شته چې ۱۲۸ یې جوازونه لري او ۲۹۵ نور یې جواز نه لري.»
دی وایي، هڅه کوي څو هغه کسان چې په غیر مسلکي ډول درمل پلوري هم ونیول شي.
په ورته وخت کې، د کندوز اوسېدونکي له سرپرست حکومته غواړي چې دغه ښار کې دې له اسنادو پرته د درملتونونو د فعالیت مخه ونیسي.
د کندوز یو اوسېدونکی حشمتالله وایي: «دا ډېره خطرناکه ده، د خلکو له برخلیک سره لوبې دي، کله چې یو درملتون جواز ونه لري فکر نه کوم چې فارمسست هم ولري، باید حکومت کنټرول ولري او د داسې درملتونونو مخه ونیسي.»
د کندوز یو بل اوسېدونکی بریالی، له جواز پرته درملتونونه د عامې روغتیا لپاره خطرناک بولي او له حکومته غواړي د هغو د فعالیت مخه ونیسي.
دا په داسې حال کې ده چې له دې مخکې هم د کندوز ځيني اوسېدونکو د تاریختېرو درملو د پلور د مخنیوي او له جواز پرته د درملتونونو د بندېدو غوښتنه کړې وه.
Views: 14
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن