غزني کې یو شمېر خلک د انټرنېټي خدمتونو له ټیټ کیفیته شکایت کوي

غزني‌ښار (پژواک، ۱۶ تله ۱۴۰۲): د غزني ولایت یو شمېر اوسېدونکي د انټرنېټي خدمتونو له خراب کیفیته شکایت کوي خو مسوولین وایي، په غزني ښار کې ۱۲ نوې مخابراتي پایې نصب شوې او ډېر ژر به انټرنېټي ستونزې حل شي.

د غزني ښار یوه اوسېدونکي عزیز عظیمي پژواک خبري اژانس ته وویل، له یوه دفتر سره کار کوي هره ورځ باید څو انځورونه خپل مرکزي دفتر ته ولېږي، خو د کمزوري انټرنېټ له امله انځورونه نه شي استولای.

هغه زیاتوي: «هره ورځ مې له کمزوري انټرنېټ سره همدا حال دی، ډېرې پیسې هم پر انټرنېټ ورکوم، خو سم کار نه کوي.»

نه یوازې عزیز عظیمي، بلکې د غزني ډېری اوسېدونکي وايي، دلته تقریباً د ټولو مخابراتي شبکو انټرنېټي خدمتونه بې‌کیفیته دي.

د غزني‌ښار یوه بل اوسېدونکي احمدبلال پژواک ته وویل، ورځ تر بلې د انټرنېټ کیفیت خرابېږي.

نوموړی وايي: «که څه هم مخابراتي شبکو په ښار کې په خپلو منځو کې ساحې یا سیمې سره وېشلې، خو شبکې ته په رسېدلې سیمه کې هم انټرنېټ سم کار نه کوي.»

هغه له اړوندو ادارو غواړي چې د انټرنېټ کیفیت لوړولو ته پاملرنه وکړي او دغه راز بیې یې هم کنټرول کړي.

ورته وخت کې د مخابراتو او معلوماتي ټکنالوجۍ ریاست مسوولین په دې برخه کې د خلکو ستونزې مني او وايي، د مخابراتي شبکو د غوره خدمتونو په اړوند يې هڅې پیل کړې دي.

د غزني د مخابراتو او معلوماتي ټکنالوجۍ رییس مولوي عبدالولي طیب‌احمد پژواک ته وویل، د تخنیکي ستونزو له امله د مخابراتي شبکو خدمات کمزوري وو چې اوس په دغه ولایت کې د مخابراتو ریاست هم د انټرنېټ کیفیت او هم مکالماتي خدمتونو په برخه کې په چټکۍ سره د دغو ستونزو پر حل کار کوي.

نوموړی وايي: «موږ په مخابراتي شبکو زور راوړی چې خپل خدمتونه ښه کړي او ډېری مخابراتي شبکو د غزني په ښار کې ۱۲ نور نوي مخابراتي آنتنونه نصب کړي چې مکالماتي ستونزې حل شوې او انټرنېټي ستونزې به هم حل شي.»

د یادونې ده، په غزني ولایت کې اوسمهال یوه دولتي او څلور خصوصي مخابراتي شبکې فعالیت لري چې د غزني مرکز ترڅنګ د ۱۸ولسوالیو خلک یې هم له خدمتونو شکایت کوي او داسې ولسوالۍ هم شته چې هیڅ ډول انټرنېټي خدمتونه نه لري او اوسېدونکي یې په دې برخه کې له حکومته د جدي اقداماتوغوښتنه کوي.