امریکا د هرات له زلزله‌ځپلو سره ۱۲ میلیون ډالر مرسته اعلان کړه

[restrict paid="true"]

اټلانټا (پژواک، ۲۱ تله ۱۴۰۲): د امریکا بهرنیو چارو وزارت د هرات ولایت له زلزله‌ځپلو سره د ۱۲ میلیون ډالرو مرستې اعلان وکړ.

د افغانستان لپاره د امریکا ځانګړي استازي د تلې په ۲۱مه پر اېکس شبکې په دې اړه د بهرنیو چارو وزارت اعلامیه خپره کړې ده.

په اعلامیه کې راغلي، د هرات له زلزله‌ځپلو سره ۱۲ میلیون ډالر مرسته اعلانوي چې د امریکا نړۍوالې پرمختیایي ادارې (یو‌اېس‌ای‌اې‌ډي) له خوا ترسره کېږي.

سرچینې زیاته کړې چې له دې مرستې سره به د زلزله‌ځپلو لومړنۍ اړتیاوې پوره شي.

د امریکا بهرنیو چارو وزارت ویلي چې له زلزلې وروسته د امریکا نړۍوالې پرمختیایي ادارې (یو‌اېس‌ای‌اې‌ډي) ټیم له نورو نړۍوالو ټیمونو سره یو ځای د پېښې ساحې ته ورسېدل، زیانونه یې وارزول او بېړنۍ روغتیایي مرستې یې پیل کړې.

په اعلامیه کې راغلي چې تازه اعلان شوې مرسته به له (ای‌او‌اېم) سره په ګډه هلته ځپلو کورنیو ته د سرپناه لپاره خېمې، د اشپزخانې وسایل، کمپلې، جامې او نور د اړتیا وړ لومړني توکي ورکړل شي.

سرچینې زیاته کړې چې دغه راز هلته د پاکو اوبو ستونزه هم شته او دوی له ای او اېم سره به ګډه د دې ستونزې هوارولو هڅې هم پیل کړې دي څو د ناروغیو مخنیوی وشي.

د امریکا بهرنیو چارو وزارت ویلي، اوس هم له افغانستان سره تر ټولو ستر مرسته‌کوونکی هېواد دی او د جمهوریت له سقوط وروسته یې له دوه میلیارد ډالرو ډېره مرسته کړې ده.

د یادونې ده، د اکتوبر په ۷مه په هرات کې د سختې زلزلې له امله شاوخوا ۲۵۰۰ کسان مړه او تر ۲۵۰۰ زیات نور ژوبل شول.

له هغې وروسته څو ځلې نورې هم زلزلې شوې او خلک یې زیانمن کړي دي.

[/restrict]