کابل کې د پنځه میلیون ډالرو په پانګونه د مالګې د تولید فابریکه پرانیستل شوه

<p style="text-align: justify;">کابل (پژواک، ۲ لړم ۱۴۰۲): د کابل د چهاراسیاب ولسوالۍ په «سنګ نویشته» سیمه کې د پنځه میلیون ډالرو په پانګونه د ایوډین‌ لرونکې مالګې د تولید فابریکه پرانیستل شوه.</p>

<p style="text-align: justify;">د دې فابریکې مسوول امان شرین‌زاده د پرانیستې مراسمو کې وویل، له تېرو ۴۰ کلونو راهیسې یې په پاکستان کې فعالیت درلود، خو د اسلامي امارت له راتګ وروسته د سوداګرۍ او پانګونې خونې په بلنه هېواد ته راغلی او پانګونه یې وکړه.</p>

<img class="aligncenter wp-image-572461 size-full" src="https://pajhwok.com/wp-content/uploads/2023/10/نمک-آیدین-دار.jpg" alt="" width="519" height="346" />

<p style="text-align: justify;">هغه وايي، په دغه فابریکه یې پنځه میلیون ډالر پانګونه کړې او شاوخوا ۱۸۰ کسانو ته په کې د کار زمېنه برابره شوې ده.</p>

<p style="text-align: justify;">هغه زیاته کړه، که په کافي اندازه برېښنا ورته په اختیار کې ورکړل شي، نو فابریکه يې په ۲۴ ساعتونو کې د ۸۰۰ ټنه مالګې د تولید ظرفیت لري.</p>

<p style="text-align: justify;">د امان په خبره، د مالګې فابریکې یوه څانګه په غزني ولایت کې هم لري او دغه راز پلان لري چې په راتلونکي کې یوه فابریکه په ننګرهار کې هم جوړه کړي.</p>

<p style="text-align: justify;">دغه راز په دې غونډه کې د افغانستان د سوداګرۍ او پانګونې خونې سرپرست یونس مومند وویل چې د دغه ډول فابریکې جوړول د هېواد په اقتصادي برخه کې ډېر ارزښت لري.</p>

<p style="text-align: justify;">هغه د فابریکې له مسوولینو غوښتنه وکړه چې د مالګې کیفیت ته جدي پاملرنه وکړي.</p>

<p style="text-align: justify;">نوموړي له حکومته غوښتنه وکړه چې د خصوصي سکتور ستونزو ته رسېدنه وکړي.</p>

<p style="text-align: justify;">مومند دا هم وویل چې په کراچۍ بندر کې د افغانستان د ۱ اعشاریه ۵ میلیارده ډالرو په ارزښت مالونه په غیرقانوني توګه بند پاتې دي او نړۍوال دې په دې برخه کې ورسره همکاري وکړي.</p>

<p style="text-align: justify;">هغه زیاته کړه چې افغانستان له ټولو هېوادونو سره د متقابل احترام پر اساس سوداګري غواړي.</p>

<p style="text-align: justify;">په دې غونډه کې د افغانستان د سوداګرۍ او پانګونې خوندې مرستیال خان‌جان الکوزي له سوداګرۍ وزارته غوښتنه وکړه، په هېواد کې دې هغو پانګوالو ته پاملرنه زیاته کړي چې نومې پانګونه کوي.</p>

<p style="text-align: justify;">الکوزي زیاته کړه، د افغان سوداګرو شاوخوا ۴۰۰۰ کانټینره په کراچۍ بندر کې ولاړ دي او ځينې توکي امکان لري چې خراب شي او په دې برخه کې یې له نړۍوالو د همکارۍ غوښتنه وکړه.</p>

<p style="text-align: justify;">هغه زیاته کړه، پاکستان د افغانستان له لارې خپل توکي منځنۍ اسیا ته صادروي او تر اوسه د افغانانو له لوري ورته کومه ستونزه نه ده جوړه شوې.</p>

<p style="text-align: justify;">هغه له پاکستانه غوښتنه وکړه چې د افغان سوداګرو د مالونو انتقال په برخه کې دې ستونزې نه جوړوي.</p>