کابل (پژواک، ۳ لړم ۱۴۰۲): د کډوالو او راستنېدونکو چارو سرپرست وزیر وایي، د افغانستان له خلکو سره مرستې ډېرې اعلانېږي خو اغېز یې نه معلومېږي؛ ځکه مرستې تر ډېره د موسسو په اداري برخو کې لګېږي.
د یاد وزارت په خبرپاڼه کې راغلي چې د دغه وزارت سرپرست خلیلالرحمان حقاني د مرکزي اسیا لپاره د اروپایي ټولنې د پرمختیایي مرستو برخې له مشرې سارا او د یادې ټولنې د سفیرې له مرستیال لوډویک او مل پلاوي سره په کابل کې وکتل.
سرچینې لیکلي چې په دې لیدنه کې د افغان کډوالو د ستونزو او په هرات کې د وروستیو زلزلو له امله د بېځایه شوو او له هغوی سره د بشري مرستو د څرنګوالي په اړه بحث او خبرې وشوې.
د پرمختیايي مرستو برخې مشرې سارا وویل: «اروپایي ټولنې د هرات له زلزلهځپلو سره څلورنیم میلیون یورو مرسته اعلان کړې، دغه راز له راستنېدونکو سره د مرستې لپاره یې د کډوالۍ له نړۍوال سازمان سره د ۱۵ میلیون یورو هوکړه لاسلیک کړې، دا ټول د دې ښکارندویي کوي چې موږ د کډوالو د راتګ لپاره چمتو یو او افغانان هيڅکله یوازې نه پرېږدو.»
بلخوا د کډوالو چازو سرپرست وزیر ویلي، له افغانستان سره مرستې ډېرې اعلانېږي خو مثمره پایله یې نه ترسترګو کېږي؛ ځکه مرستې تر ډېره د موسسو په اداري برخو کې لګېږي.
هغه زیاته کړې، مرستې دې کډوالو ته د دایمي سرپناه، کلینیکونو او ښوونځیو جوړولو او نورو بنسټیزو پروژو کې مصرف شي څو د خلکو په ژوند کې مثبت بدلون راشي.
نوموړي وویل: «موږ په ۲۸ ولایتونو کې د مهاجرینو لپاره ښارګوټي لرو، په هغو کې د مهاجرینو ځای پر ځای کولو لپاره لومړنیو اسانتیاوو چمتو کولو ته اړتيا ده او مرستندوی هېوادونه او بنسټونه دې په دې برخه کې مرستې وکړي.»
Views: 27
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن