شبرغان (پژواک، ۱۳ لېندۍ ۱۴۰۲): له پاکستان او ایرانه یو شمېر را ایستل شوي افغانان چې د جوزجان په مرکز شبرغان ښار کې په موقتي کمپونو کې ځای پر ځای شوي، له سرپرست حکومت او مرستندویه موسسو د مرستو له امله مننه کوي، خو د سرپناه او کاري فرصتونو برابرېدو غوښتنه کوي.
د یادونې ده، د دغو کډوالو لپاره د شبرغان ښار د پُل خراسان بزکشۍ په میدان کې او د دغه ولایت په آقچې ولسوالۍ کې موقت کمپونه جوړ شوي او لومړني امکانات ورته برابر شوي دي.
ډېری دغه راستانه شوي کډوال وایي چې هېواد ته له هیڅ ډول امکاناتو پرته راستانه شوي دي.
له پاکستانه یو راستون شوی افغان ګلاحمد چې په شبرغان ښار کې په دغه جوړ شوي کمپ کې له خپلې کورنۍ سره شپې او ورځې تېروي، له کډوالو سره د پاکستان د حکومت له ناسم چلنده شکایت کوي.
هغه د اسلامي امارت له مسوولینو او د افغانستان خلکو له هرکلي مننه وکړه، زیاته یې کړه: «پاکستان ته د کار لپاره لاړم، خو له تحقیر او توهین پرته نور څه نه وو، دا چې هېواد ته راستون شوم خوښ یم، د هر چا لپاره یې خپل وطن او خپل خلک.»
نوموړي وزګاري او اقتصادي ستونزې لویه ننګونه وبلله او له سرپرست حکومته یې غوښتنه وکړه چې دوی ته دې د کار زمینې برابرولو برخه کې هم پاملرنه وکړي.
په ورته وخت کې د شبرغان ښار د پُل خراسان په بزکشۍ میدان کې جوړ شوي کمپ ته یوه بل راستون شوي قادرالله پژواک ته وویل چې د بېکارۍ او اقتصادي ستونزو له امله پاکستان ته تللی و، خو خالي لاس بېرته هېواد ته راستون شوی دی.
هغه له سرپرست حکومت او مرستندویه بنسټونو غواړي چې خپلو مرستو ته دوام ورکړي.
قادرالله د خپلې کډوالۍ د ترخو ورځو په اړه چې په ده تېرې شوې وایي: «دا چې پاکستان کې به کومه ستونزه پیدا کېده، په بېلابېلو پلمو به یې افغانان نیول او موږ هیڅ د خوښۍ ورځ نه لرله.»
دغه راز له پاکستانه یو بل راستون شوی افغان عبدالواحد وایي: «دې وروستیو میاشتو کې د پاکستان پولیسو په بېلابېلو پلمو له موږ پیسې اخیستې، موږ یې نیولو او زنداني کولو یې.»
هغه وایي که له بې وزلۍ او بې کارۍ سره مخ نه وای، هيڅکله به هغه هېواد ته نه وای تللی، هغه له اسلامي امارته وغوښتل: «زموږ غوښتنه دا ده چې بېکاري دې له منځه یوسي، خلکو ته دې کار پیدا شي، څو هيڅوک نورو هېوادونو ته احتیاج محتاج نه شي.»
هغه هم له حکومت او مرستندویه بنسټونو د دوامداره مرستو غوښتنه وکړه.
د جوزجان د کډوالو او بېرته راستنېدونکو چارو رییس امانالله طلحه پژواک ته وویل چې د اسلامي امارت د مشرتابه د فرمان له مخې، له پاکستانه او ایرانه په زور را ایستل شوي کډوالو د ستونزو ارزونې او اسانتیاوو برابرولو لپاره پلاوی ټاکل شوی او دا وضعیت مدیریت کوي.
هغه وویل: «تراوسه جوزجان ته له ایران او پاکستانه ۷۵۰ کورنۍ راغلي او ښځې او ماشومان هم په کې شامل دي، موږ دغو کورنیو ته کمپونه جوړ کړي او لومړني اړین توکې مو ورکړي دي.»
د جوزجان د طبیعي پېښو پر وړاندې د چمتووالي ادارې رییس سراجالدین سراجي وایي چې دغو را ایستل شوو کډوالو ته لومړني توکي لکه ۵۰ کیلوګرامه اوړه، ۱۵ کیلوګرامه وریجي، د کور وسایل او ژمني جامې ورکړل شوي دي.
نوموړي وویل چې د مرستو د وېش او روغتیایي ټیمونه په سیمه کې ۲۴ ساعته حضور لري.
Views: 12
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن