پاراخ (پژواک ۲۸ لېندۍ ۱۴۰۲): د پنجشېر د کانونو ریاست وايي چې په اتم ځل د دغه ولایت له کانونو د ۱۲۳ زره او ۴۰۰ ډالرو په ارزښت تازه استخراج شوي زمرد پلورل شوي دي.
پنجشېر کې د زمردو د کانونو پر استخراج له شاوخوا دوو کلونو راهیسې بندیز لګېدلی و، خو سږ کال د زمري میاشتې په وروستیو کې بېرته پیل شو او تر اوسه د دغه ولایت له کانونو استخراج شوي زمرد په اتو پړاونو کې د داطلبۍ له لارې پلورل شوي دي.
د پنجشېر د کانونو رییس محمدقاسم امیر نن پژواک خبري اژانس ته وویل چې په اتم ځل د دغه ولایت له کانونو استخراج شوي ۲۱۱۸ قیراطه زمرد په ۱۲۳۴۰۰ امریکايي ډالرو پلورل شوي دي.
هغه څرګنده کړه چې د دغه زمردو د پلور په داوطلبۍ کې له پنجشېر، پروان، کابل، کندهار، لوګر، ننګرهار او نورستان ولايتونو څه باندې سلو سوداګرو برخه اخيستې وه.
د هغه په خبره، دغه زمرد د پنجشېر د لومړۍ حصې ولسوالۍ له پنځو کانونو استخراج شوي وو.
د دغه ولايت زمرد په تېرو څلورو مياشتو کې د اوو نورو داوطلبیو له لارې هم پلورل شوي دي.
د پنجشېر د کانونو رييس وايي چې په اتو داوطلبیو کې د دوه ميليونه ١٩٣ زره ٣٠٠ امريکايي ډالرو په ارزښت د دغه ولايت له کانونو استخراج شوي زمرد پلورل شوي دي.
د هغه د معلوماتو له مخې، له دې لارې د لس سلنه رویالټۍ په پام کې نیولو سره ٢١٩٣٣٠ امريکايي ډالر د حکومت بودجې ته تللي دي.
د پنجشېر د کانونو رياست د معلوماتو پر بنسټ، په دغه ولايت کې د زمردو د ثبت شوو کانونو ټولټال شمېر ١٢٥٠ ته رسېږي چې له دې ډلې له ٣٥٠ کانونو استخراج جریان لري او څه باندې اووه زره کسان په کې پر کار بوخت دي.
Views: 37
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن