کابل (پژواک، ۲ مرغومی ۱۴۰۲): د عامې روغتیا سرپرست وزیر د افغانستان په چارو کې د مالیزیا له ځانګړي استازي سره په لیدنه کې ویلي، د هېواد دروازې د هر ډول مثبت تعامل لپاره د ټولو پر مخ خلاصې دي.
د عامې روغتیا وزارت پر خپله اېکسپاڼه د یوه پیغام په خپرولو د دغه وزارت د سرپرست ډاکټر قلندر عباد او د افغانستان په چارو کې د مالیزیا د ځانګړي استازي داتواحمد عزام د لیدنې خبر ورکړی دی.
عباد زیاته کړې، افغانستان د اسیا زړه په توګه یو مهم او خپلواک هېواد دی.
د هغه په خبره، د افغانستان له لوري نورو هېوادونو ته هیڅ ګواښ نشته او د هېواد دروازې هر ډول مثبت تعامل لپاره د ټولو پر مخ خلاصې دي.
د عامې روغتیا وزارت خبرپانې له مخې، په یاده لیدنه کې په هېواد کې د روغتیایي کارکوونکو روزنې او روږدو کسانو درملنې په اړه هم خبرې اترې شوې دي.
خبرپاڼې زیاته کړې، په یاده لیدنه کې عزام افغانستان ته د روغتیایي برخې په ګډون د مالیزیا د همکارۍ ډاډ ورکړی دی.
د یادونې ده، د عامې روغتیا سرپرست وزیر د روغتیايي خدمتونو معیاري کولو او نړۍوالې مرستې جلبولو په موخه د روان کال د لېندۍ په ۲۶مه مالیزیا ته سفر کړی دی.
Views: 48
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن