جلالاباد (پژواک، ۲۰ مرغومی ۱۴۰۲): سیمهییز مسوولین وایي، د جلالاباد – تورخم پر لويه لار او د لغمان په قرغیو ولسوالۍ کې د دوو ترافیکي پېښو له امله اوو کسانو ته مرګژوبله اوښتې ده.
د ننګرهار امنيې قوماندانۍ وياند عبدالبصير زابلي پژواک خبري اژانس ته وویل چې نن ماسپښين د جلالاباد – تورخم پر لويه لار د مومندرې ولسوالۍ اړوند لنډي خيبر سيمه کې یوه وېکسار موټر د سړک غاړې له ونې سره ټکر وکړ.
هغه وایي چې په دې پېښه کې موټرچلوونکی مړ شوی او یو بل کس ټپي دی.
د یو بل خبر له مخې، د لغمان امنیې قوماندانۍ ویاند نن له غرمې وروسته د دغه ولایت د قرغیو ولسوالۍ اړوند مشعله کمر زیارت ته څېرمه د کابل – جلالاباد پر لویه لار د یوه سراچه او فیلډر موټرو ترمنځ ټکر شوی دی.
هغه وایي چې په دې پېښه کې پنځه کسان ټپیان شوي دي.
یوسفزی زیاتوي چې ټپیان د درملنې په موخه د ننګرهار حوزوي روغتون ته لېږدول شوي دي.
د یو بل خبر له مخې، په بامیان کې هم د ترافیکي پېښې له امله نهه کسان ټپیان شوي دي.
د دغه ولایت امنیې قوماندانۍ ویاند محمدخواني رسا پژوااک ته وویل، دا پېښه نن مازدیګر د بامیان ښار د مرکز اړوند د ملایانو کلي کې د دوو موټرو د ټکر له امله شوې ده.
سرچینې ویلي په دې پېښه کې د ښځو او ماشومانو په ګډون نهه کسان ټپیان شوي دي.
Views: 104
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن