د پنجشېر د پریان اوسېدونکو انټرنېټي خدمتونو ته لاسرسی وموند

پاراخ (پژواک، ۴ سلواغه ۱۴۰۲): د پنجشېر ولایت د پریان ولسوالۍ اوسېدونکي په داسې حال کې له انټرنېټي خدمتونو برخمن شول چې له دې مخکې انټرنېټ ته د لاسرسي لپاره د دغه ولایت مرکز او یا د غرونو لوړو څوکو ته تلل.

پژواک خبري اژانس د روان کال د غبرګولي په اوولسمه راپور ورکړ چې د پنجشېر د حصه اول، ابشار او پریان ولسوالیو اوسېدونکي د انټرنېټ له نشتونه شکایت لري او وايي، هغو سیمو ته تر رسېدو پورې چې هلته انټرنېټ کار کوي، باید په ساعتونو پلې مزل وکړي او یا د موټر په وسیله د سل‌ګونو افغانیو په ورکولو هلته ځان ورسوي.

د پنجشېر د معلوماتي تکنالوجۍ د مخابراتو رییس عبدالحمید نوري نن (د سلواغې څلورمه) پژواک خبري اژانس ته وویل چې د پریان ولسوالۍ اوسېدونکي د افغان‌بیسیم مخابراتي شرکت د «تري‌جي» خدمتونو په وړاندې کولو سره له انټرنېټي خدمتونو برخمن شول.

دا په داسې حال کې ده چې تېره اونۍ د پنجشېر حصې اول ولسوالۍ اوسېدونکي هم له انټرنېټي خدمتونو برخمن شوي وو.

د پنجشېر د معلوماتي تکنالوجۍ رییس وايي چې اوس یوازې د ابشار ولسوالۍ اوسېدونکي انټرنېټ ته لاسرسی نه لري، خو د معلوماتي تکنالوجۍ ریاست هڅه کوي څو په ۱۴۰۳ کال کې د ابشار اوسېدونکي هم له یادو خدمتونو برخمن شي.

د پریان چمال کلي اوسېدونکی رامش انوري انټرنېټ ته د یادې ولسوالۍ د خلکو له لاسرسي موندلو خوښي څرګندوي او وایي: «کله چې به انټرنېټ ته اړتیا پیدا شوه، خلک به د پنجشېر مرکز ته تلل، د لارې کرایه یوازې ۵۰۰ افغانۍ کېده او دغه راز ځیني د غرونو لوړو څوکو ته ختل. اوس د انټرنېټ خدمتونو د عرضې په پیل سره د خلکو دغه ستونزه هواره شوې ده.»

د پریان کورپیتاب کلي اوسېدونکی ندیم هم انټرنېټ ته د یادې ولسوالۍ د اوسېدونکو له لاسرسي خوښ دی او وايي، خپلې هیلې ته چې انټرنېټ ته لاسرسی و، رسېدلی دی.