اسعداباد (پژواک، ۲ کب ۱۴۰۲): د کونړ وټهپور ولسوالۍ د څپري سیمې اوسېدونکي وایي، ۲۵ کاله مخکې یې په خپل شخصي لګښت د یوه ښوونځي لپاره ودانۍ جوړه کړې وه چې اوس د بارانونو له امله ویجاړه شوې ده.
د کونړ د وټهپور ولسوالۍ د څپري سیمې یوه قومي مشر حاجي عبدالولي پژواک خبري اژانس ته وویل، ۲۵ کاله مخکې یې د ولسي خلکو په شخصي لګښت په سیمه کې د ښوونځي لپاره د شپږو خونو خټینه ودانۍ جوړه کړې وه چې اوس د اورښتونو له امله ویجاړه شوې ده.
نوموړي وویل: «موږ په یوې غرنۍ سیمه کې اوسېږو، نه مو د لېسې لپاره ودانۍ شته او نه هم د متوسطې لپاره، په ولسي مرستو مو کالونه وړاندې شپږ خټینې خونې جوړې کړې، خو هغه هم بارانونو خرابې کړې او د لوېدو له وېرې پهکې زدهکوونکې درس ته زړه نه ښه کوي.»
هغه وایي، د ودانۍ نشتوالي له امله اړ دي د اورښتونو پر مهال زدهکوونکي رخصت کړي.
د څپرې لېسې یو ښوونکی زرولي وردګ وایي، په سیمه کې یې له ۱۵۰۰ ډېرې کورنۍ ژوند کوي چې ماشومان یې د ښوونځي ودانۍ نشتوالي له امله تر شنه اسمان لاندې زدهکړې کوي.
هغه وویل: «د څپري په لېسه کې شاوخوا ۵۰۰ زدهکوونکي درس وایي، زدهکوونکي د چت او دېوالونو د غورځېدو له وېرې په هغو خټینو اتاقونو کې نه شو کېنولی چې پخوا مو جوړ کړي، مجبور یو تر شنه اسمان لاندې ورته زدهکړې ورکړو.»
هغوی له حکومته غواړي چې د دې غرنۍ سیمې د نورو ګڼ شمېر ستونزو ترڅنګ د ښوونځي ودانۍ ستونزې ته رسېدنه وکړي.
خو د دغه ولایت پوهنې ریاست چارواکي بیا وايي، هڅه کوي په دغه ولایت کې ټولو هغو ښوونځیو ته ودانۍ جوړې کړي چې نه یې لري.
نوموړي وویل: «موږ د څپري لېسې له ودانۍ له نږدې کتنه کړې، رښتیا هم چې خونې یې له خټو ګټو جوړې شوې او اوس مهال زیانمنه شوې، موږ هڅه کوو چې د یادې ودانۍ ترڅنګ د کونړ په نورو سیمو کې هم د ښوونځیو شته ودانۍ ترمیم او یا هم نوې جوړې کړو.»
هغه زیاتوي، د اسلامي امارت له حاکمیت راوروسته په دغه ولایت کې د ښوونځیو لپاره درې نوې ودانۍ جوړې شوې، ۴۴ ودانۍ ترمیم شوې او ۲۷ نورې ودانۍ د بېلابېلو همکارو موسسو له لوري ترمیم او د احاطې دېوالونه یې جوړ شوي دي.
Views: 152
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن