کابل کې نهه کسان له بېلابېلو نشه‌یي توکو سره نیول شوي

کابل (پژواک، ۳ کب ۱۴۰۲): د کابل امنیه قومانداني وایي، د ښار په بېلابېلو سیمو کې یې ۱۲۸ ګرامه هیروئین او څه باندې درې زړه قرصه «ذیکب» او «کا» ټابلیټونه ترلاسه شوي چې په تړاو یې نهه کسان هم نیول شوي دي.

د کابل د امنیه قوماندانۍ ویاند خالد ځدران پر خپله اېکس‌پاڼه لیکلي چې دغه نشه‌یي توکي په تېرو ۲۴ ساعتونو کې د کابل ښار په بېلابېلو سیمو کې ترلاسه شوي دي.

هغه لیکلي، له یادو نهه کسانو سره ۱۲۸ ګرامه هیروئین، درې زره قرصه ذیکب، ۷۳ قرصه کا ټابلیټ نیول شوي او دوسیې به یې له څېړنو وروسته اړوندو ارګانونو ته وسپارل شي.