<p style="text-align: justify;">مهترلام (پژواک، ۱۷ کب ۱۴۰۲): د لغمان په مرکز مهترلام کې له یو خصوصي روغتیایي مرکزه د ۸۰ نجونو په ګډون ۲۳۲ محصلین فارغ شول.</p>
<p style="text-align: justify;">فارغ شوي ځوانان د خوښۍ څرګندولو ترڅنګ له دولته د کاري چاپېریال رامنځته کېدو غوښتنه کوي.</p>
<p style="text-align: justify;">د یاد خصوصي طیبي مرکز نرسنګ له څانګې یوه فارغ شوي محمدنواب خان نیازي پژواک خبري اژانس ته وویل: «خوښ یم چې د عالي نرسنګ له څانګې فارغ شوم خو له دولته غوښتنه کوم چې زما په ګډون فارغ شوو ځوانانو ته کاري ماحول برابر کړي.»</p>
<p style="text-align: justify;">په لغمان کې د شفا خصوصي طبي مرکز مطبوعاتي مسوول جاوېد مسرور پژواک ته وویل چې نن د دغه انسټيټیوټ اړوند عالي نرسنګ، عالي قابلګۍ، طبي ټکنالوجي او فارمسي له څانګو ۲۳۲ کسان فارغ شول.</p>
<p style="text-align: justify;">هغه زیاته کړه چې په فارغ شوو کې ۸۰ نجونې شاملې دي چې نن ټولنې ته د خدمت په موخه وړاندې شوې.</p>
