ا.ا د افغانستان اقتصادي وضعیت په اړه د نړۍوال بانک راپور ځینې برخې ستایلې او ځینې رد کړې

کابل (پژواک، ۴ غویی ۱۴۰۳): د ریاست‌الوزراء اقتصادي معاونیت وايي، اسلامي امارت د نړۍوال بانک د راپور هغه برخې چې مثبتې او پر واقعیتونو ولاړې دي، ستایي او هغه برخې چې له عیني واقعیتونو لرې دي ردوي.

د ریاست‌الوزراء اقتصادي معاونیت له لوري په خپره شوې خبرپاڼه کې راغلي چې د افغانستان اقتصادي وضعیت په اړه د نړۍوال بانک له لوري د ۲۰۲۴ کال د اپرېل په ۱۸مه راپور خپور شوی چې د افغانستان اقتصادي وضعیت ته په‌کې کتنه شوې ده.

اقتصادي معاونیت ویلي، په راپور کې راغلي چې له تېرو څه باندې دوو کلونو راهیسې د افغانستان اقتصادي حالت ټکنی دی، د کورني ناخالص تولید کچه ټيټه شوې، انفلاسیون کم شوی، بازار ته د اړتیا وړ افغانۍ عرضه کولو کې کموالی راغلی او په سوداګرۍ کې هم کسر موجود دی.

په دغه راپور کې زیاته شوې چې د افغانۍ ارزښت د بهرنیو اسعارو پر وړاندې لوړ شوی، په هېواد کې د نشه‌یې توکو کرکېله ۹۰ سلنه کمه شوې او د ۲۰۲۳ کال لپاره له ټاکلي هدفه ۹ سلنه ډېر عواید راټول شوي دي.

اعلامیه کې د یاد راپور په اړه ویل شوي، د ریاست الوزرا اقتصادي معاونیت د دغه راپور هغه برخې چې مثبتې او پر واقعیتونو ولاړې دي ستایي او هغه برخې چې له عیني واقعیتونو لرې دي، ردوي.

سرچینې لیکلي، دا ځکه چې د اسلامي امارت له راتګ وروسته د کورني ناخالص تولید اندازه لوړه شوې، د خوراکي او غیرخوراکي توکو بیو ټیټېډو اساسي لامل په کور دننه د دغو توکو د تولید زیاتوالی دی، د معقولو پولي سیاستونو پر اساس د مارکېټ ارزونې او تقاضا له مخې بازار ته افغانۍ عرضه شوې او د سوداګرۍ د کسر په کمېدو کې د پام وړ پرمختګ شوی دی.

په اعلامیه کې د بېلکې په توګه ویل شوې چې په ۱۴۰۰ کال کې د افغانستان د صادراتو ارزښت شاوخوا ۸۵۰ میلیون ډالره و خو په ۱۴۰۲ کال کې د صادراتو کچه دوه میلیارد ډالرو ته ورسېده او د تېر په پرتله د وارداتو اندازه هم کمه شوې چې اساسي علت یې په کور دننه د خوراکي او غیرخوراکي توکو په تولید کې زیاتوالی دی.

وړاندې لیکل شوي، اسلامي امارت په هېواد کې د کانونو، زېربنا، صنعت، کرنې او نورو برخو کې سلګونو زرو کسانو ته د کار زمینه برابره کړې او زیاتوي چې ښه بېلګه یې د ۱۴۰۳ کال په وري میاشت کې د ۱۶،۵ میلیارد افغانیو په ارزښت د نهو زېربنایي پروژو پرانیسته وه.

اعلامیه کې ویل شوي، په دغه راپور کې راغلي چې د اسلامي امارت له لوري د نشه‌یي توکو کرکېلې بندېدو له امله زرګونو بزګرانو خپل عاید له لاسه ورکړي دي.

اقتصادي معاونیت ویلي، اسلامي امارت دا مني چې په ټول هېواد کې یې د نشه‌یي توکو پر کرلو بندیز لګولی او بزګرانو ته یې د بدیل کښت برابرولو لپاره خپلو هڅو ته دوام ورکړی او ترڅنګ یې له نړۍوالې ټولنې غواړي چې په دې اړه خپل مسوولیت اداء کړي.

اعلامیه کې ویل شوي، اسلامي امارت پر دې باور دی، که نړۍواله ټولنه مثبت تعامل وکړي، بندیزونه لري کړي، د افغانستان کنګل شوې شتمني ازاده او د پراختیايي پروژو د تمویل ترڅنګ په مختلفو برخو کې همکاري وکړي، په پایله کې به یې نوي کاري فرصتونه رامنځته او د هېواد پر اقتصادي وضعیت به مثبته اغېزه وکړي.