<p style="text-align: justify;">ترینکوټ (پژواک، ۱۱ غویی ۱۴۰۳): اروزګان کې د ښوونځیو کمښت له امله څه باندې ۸۰ زره ماشومان له زدهکړو پاتې دي، او مسوولین د ښوونځیو جوړېدو لپاره له نړۍوالو مرستندویه ادارو د همکاري غوښتنه کوي.</p>
<p style="text-align: justify;">د اروزګان د پوهنې رییس مولوي شمسالله کامران اخندزاده تېره ورځ په یوه خبري غونډه کې د جزییاتو له ورکولو پرته وویل، اوسمهال د دغه ولایت په مرکز او ولسوالیو کې ۲۵۸ ښوونځي شته، خو یو شمېر یې غیرفعال دي.</p>
<p style="text-align: justify;">خو هغه وویل، د ملګرو ملتونو د ماشومانو ملاتړ صندوق (یونیسف) او یو شمېر نورو مرستندویه ادارو په مرسته توانېدلي چې تېر کال ۴۴ بند او ویجاړ شوي ښوونځي بېرته د زدهکوونکو پر مخ پرانیزي.</p>
<p style="text-align: justify;">هغه وایي چې له دې سره، سره اوس هم د دغه ولایت په کچه ۸۴ زره ماشومان د ښوونځیو کمښت له امله له زدهکړو پاتې دي.</p>
<p style="text-align: justify;">د ده په خبره، د ښوونځیو شمېر د ماشومانو په پرتله کم دی.</p>
<p style="text-align: justify;">هغه اندېښنه ښيي چې که له زدهکړو پاتې ماشومانو ته نوي ښوونځي جوړ نه شي، دغه لسګونه زره ماشومان به له زدهکړو محروم او بېبرخلیکه پاتې شي.</p>
<p style="text-align: justify;">اخندزاده زیاتوي، اوسمهال له سل زرو ډېر ماشومان د دغه ولایت په ښوونځیو کې پر زدهکړو بوخت دي.</p>
<p style="text-align: justify;">ده وویل چې یوازې سږ کال ۱۹ زره ماشومان په لومړنیو ټولګیو کې ښوونځيو ته جذب شوي دي.</p>
<p style="text-align: justify;">نوموړي له ملي او نړۍوالو مرستندویه ادارو وغوښتل چې دغه ولایت کې د نوو ښوونځيو جوړولو برخه کې ورسره همکاري وکړي.</p>
<p style="text-align: justify;">ورته مهال د یاد ولایت اوسېدونکي اندېښنه ښيي چې د ښوونځیو کمښت له امله یې زرګونه ماشومان له زدهکړو پاتې کېږي.</p>
<p style="text-align: justify;">د ترینکوټ ښار اوسېدونکی حبیبالرحمن وایي، دغه ولایت کې د تېرو کلونو جګړو ډېر شمېر ماشومان له زدهکړو بېبرخي کړي دي.</p>
<p style="text-align: justify;">نوموړي وویل: «اوس چې امن راغلی نو اړینه ده چې مسوولین ماشومانو ته د زدهکړو زمینه برابره کړې او د دغه ولایت په ټولو سیمو کې د اړتیا وړ ښوونځي فعال کړي.»</p>
<p style="text-align: justify;">دغه ولایت کې یو ټولنیزفعال عطاالله افغان وايي، له زدهکړو څخه د یاد شمېر ماشومانو پاتېکېدل ورته د اندېښنې وړ خبره ده.</p>
<p style="text-align: justify;">هغه زیاتوي چې دغه ولایت له کلونو راهیسې د ښوونې او روزنې برخه کې له نورو وروسته پاتې دی.</p>
<p style="text-align: justify;">د ده په وینا، د تېرو څه باندې شلو کلونو جګړو اروزګان کې د ښوونې او روزنې بهیر له سختو ستونزو سره مخ کړی و.</p>
<p style="text-align: justify;">افغان وایي چې له اوسني امنیتي وضیعت څخه په ګټې اخیستنې باید د دغه ولایت د خلکو ستونزو ته ځانګړې پاملرنه وشي.</p>
<p style="text-align: justify;">نوموړي له اسلامي امارت او مرستندویه ادارو وغوښتل چې دغه ولایت کې د اړتیا وړ ښوونځیو جوړولو په موخه لاس په کار شي.</p>
<p style="text-align: justify;">هغه وویل: «د اوسني حکومت زیات شمېر مشران د دغه ولایت اوسېدونکي دي، له هغوی څخه په ځانګړې توګه غوښتنه کوو چې د اروزګان د پوهنې برخه له شته حالت څخه د پرمختګ لوري ته اوچته کړي.»</p>
<p style="text-align: justify;">په همدې حال کې هغه ماشومان چې په سیمو کې یې ښوونځي نشته او یا ورڅخه لرې دي، غوښتنه کوي چې په خپلو سیمو کې دې ښوونځي ورته جوړ شي.</p>
<p style="text-align: justify;">د دغه ولایت د چورې ولسوالي اړوند د نیازو سیمې یو اوسېدونکی ۱۴ کلن شمسالله چې د اووم ټولګي زدهکوونکی دی، وايي: «زموږ په سیمه کې هیڅ ښوونځی نشته، موږ مجبور یو هره ورځ د ولسوالۍ تر بازاره ولاړ شو، ښوونځی مو هلته دی، دلته ډېر نور ماشومان شته چې ښوونځي ته نه ځي.»</p>
<p style="text-align: justify;">دا په داسې حال کې ده چې تېره اونۍ د دغه ولایت په مرکز او ولسوالیو کې د سېلابونو راوتلو له امله ۷۰ ښوونځي او مدرسې زیانمن شوي او مسوولین وایي چې د زدهکوونکو په درسي بهیر یې منفي اغیز کړی دی.</p>
