کابل (پژواک، ۱۵ غویی ۱۴۰۳): ټاکل شوې وه چې نن د قوشتېپې جام شل اووریزو سیالیو په لړ کې د بست او سپینغر زون لوبډلو ترمنځ لوبه ترسره شي، خو په کابل کې د ورښت له امله دغه لوبه لغوه شوه.
د افغانستان کرکټ بورډ ویلي، د قوشتېپې ملي شل اووریز جام سیالیو اوومه لوبه چې ټاکل شوې وه نن د بست او سپینغر زون لوبډلو ترمنځ ترسره شي، په کابل کې د دوامداره ورښت له امله لغوه شوه.
يادې سیالۍ د روانې مې میاشتې په لومړۍ نېټه په کابل کې پیل شوې او ټاکل شوې هره ورځ به دوه دوه لوبې ترسره کېږي.
د دغو سیالیو په لومړۍ ورځ (د مې لومړۍ نېټه) دوه لوبې ترسره شوې چې بند امیر لوبډلې بُست او سپینغر لوبډلې بیا مسعینک لوبډلې ته ماتې ورکړه.
دغه راز، د دغو سیالیو په دویمه ورځ (د مې دویمه) هم دوه لوبې وشوې چې بند امیر لوبډلې امو او مسعینک لوبډلې بیا بُست ته ماتې ورکړه.
همدارنګه پرون هم د دغو سیالیو په درېیمه ورځ ټاکل شوې وه دوه لوبې ترسره شي، خو د ورښت له امله په سهار کې د سپینغر او امو زون لوبډلو ترمنځ پنځمه لوبه بې پایلې شوه او دواړو لوبډلو ته یوه یوه نومره ورکړل شوه.
دغه راز، پرون ماسپښین بیا د بند امیر او مس عینک زون لوبډلو ترمنځ شپږمه لوبه هم د ورښت له امله لغوه شوه.
د یادونې ده، دغه سیالۍ به د روانې مۍ میاشتې تر ۱۳مې پورې په کابل لوبغالي دوام ولري.
