د پژواک له راپور وروسته یونیسېف اروزګان کې ۱۳ نوي ښوونځي جوړوي

ترینکوټ (پژواک، ۲۳ غویی ۱۴۰۳): اروزګان کې د ښوونځيو د کمښت په تړاو د پژواک د راپور له خپرېدو وروسته، اوس د ملګرو ملتونو د ماشومانو د ملاتړ صندوق (یونیسېف) استازو ویلي چې په دغه ولایت ۱۳ نوي ښوونځي جوړوي.

پژواک خبري اژانس شاوخوا دوه اونۍ مخکې په اروزګان ولایت کې د ښوونځيو د کمښت په اړه راپور خپور کړ؛ اوس د ملګرو ملتونو د ماشومانو د ملاتړ صندوق (یونیسېف) ولایتي مسوول ډاکټر احمدفواد د دغه ولایت د اقتصاد له رییس سره لیدلي دي.

د اقتصاد رییس مولوي مولاداد حسن پژواک خبري اژانس ته وویل، د یونیسېف ولایتي استازو ډاډ ورکړی چې د روان زېږدیز کال تر پایه په مرکز ترینکوټ او ولسوالیو کې ۱۳ نوي ښوونځي جوړوي او دغه راز د شاوخوا اوو ښوونځيو ودانۍ بیارغوي.

حسن زیاته کړه، یونیسېف تېر کال هم په دغه ولایت کې د شلو ښوونځیو لپاره نوې ودانۍ جوړې کړې او دغه راز پلان لري چې دغو ښوونځیو ته مسلکي ښوونکي هم وګوماري.

نوموړي وویل، د یادې ادارې مسوول ژمنه وکړه چې په دغه ولایت کې به له څه باندې ۵۰ روغتیایي مرکزونو سره د درملو او نورو طبي وسایلو مرسته هم وکړي.

Views: 21