فاریاب کې د دوو ماشومانو تښتونې په تړاو نهه کسان نیول شوي

میمنه (پژواک، ۱۳ غبرګولی ۱۴۰۳): فاریاب ولایت کې امنیتي ځواکونو د غزني د امنیه قوماندان زوی او خوریی له تښتوونکو ژغورلي او په تړاو یې نهه کسان نیولي دي.

د مسوولینو د معلوماتو له مخې، دغه ماشومان چې ۱۱ او ۱۲ کلونه عمرونه لري، تېره ورځ له غرمې مخکې د فاریاب له مرکز میمنې ښاره تښتول شوي وو او د همدې ورځې په ماسپښین د امنیتي ځواکونو له خوا د تښتوونکو له منګولو وژغورل شول.

د فاریاب د اطلاعاتو او فرهنګ ریاست پرون ویلي وو چې دغه دوه ماشومان د غزني ولایت د امنیه قوماندان مخدوم محمدعالم رباني زوی او خوریی دي؛ رباني د فاریاب ولایت اصلي اوسېدونکی دی.

د کورنیو چارو وزارت ویاند عبدالمتین قانع نن (د غبرګولي ۱۳مه) پر خپله اکس‌پاڼه لیکلي چې د فاریاب امنیې قوماندانۍ امنیتي ځواکونو هغه نهه انسان‌تښتوونکي نیولي چې تېره ورځ یې د دغه ولایت په مرکز میمنې ښار کې دوه ماشومان تښتولي وو.

هغه ویلي چې پولیسو ماشومان ژغورلي او خپلو کورنیو ته یې سپارلي دي.