کابل (پژواک، ۲۲ غبرګولی ۱۴۰۳): د لوړو زدهکړو سرپرست وزیر په کازان ښار کې د لوړو زدهکړو وزیرانو د نړۍوال فورم له غړو هېوادونو غوښتي چې له افغانستان سره په علمي ډګر کې د ګډو همکاریو هوکړې او تړونونه لاسلیک او عملي کړي.
د لوړو زدهکړو وزارت په خبرپاڼه کې راغلي چې د دغه وزارت سرپرست شیخ ندامحمد ندیم د روسیې د پوهنې او لوړو زدهکړو وزیرانو په دویمه نړۍواله ناسته کې ګډون او وینا وکړه.
سرچینې لیکلي، د یادې ناستې موخه د غړو هېوادونو ترمنځ د ګډو علمي همکاریو رامنځته کول، په راتلونکي کې د ګډو اکاډمیکو پروګرامونو جوړول او د یوبل له تجربو ګټه اخیستل او په علمي ډګر کې د شته ستونزو پروړاندې مبارزه ده، ۴۲ هېوادونه یې غړیتوب لري او هر کال د فدارتیف روسیې په تاتارستان هېواد کې جوړېږي.
ندیم په دغه ناسته کې ویلي، اسلامي امارت د علم پرمختګ او په دې ډګر کې له سیمي او نړۍ سره سیال کېدو ته ژمن دی.
هغه زیاته کړې: «د ا.ا.ا له حاکمیت وروسته زموږ هېواد د سیاسي، اقتصادي او نورو برخو ترڅنګ په تحصیلي ډګر کې هم ډېر پرمختګونه کړي چې د بېلګې په توګه د ۱۳۱ څانګو د نصاب بیاکتنه او ۱۴ سترو زېربنایي پروژو بشپړول یادولی شو. همدارنګه اوسمهال شاوخوا ۵ سوه زره محصلین د افغانستان په پوهنتونونو کې پر زدهکړو بوخت دي.»
ندیم ویلي، افغانستان تل د نورو له یرغل سره مخ شوی او زیان یې لیدلی دی. د ا.ا.ا هېڅ وخت د چا په کورنیو مسایلو کې مداخله نه ده کړې او له نورو هم د ورته عمل توقع لري.
د لوړو زده کړو سرپرست وزیر د روسیې د پوهنې او لوړو زدهکړو وزیرانو دویمې نړۍوالې ناستې له غړو هېوادونو څخه وغوښتل چې له افغانستان سره په علمي ډګر کې د ګډو همکاریو هوکړې او تړونونه لاسلیک او عملي کړي.
هغه ویلي چې د دغو تړونونو په رڼا کې دواړه هېوادونه کولی شي چې د یوه بل له تجربو او مهارتونو ګټه واخلي.
Views: 25
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن