فیضاباد (پژواک، ۵ چنګاښ ۱۴۰۳): د بدخشان امنیتي سرچینې وایي چې د روان کال تېرو درېیو میاشتو کې د دغه ولایت په مرکز او ولسوالیو کې د ترافیکي پېښو له امله د ښځو او ماشومانو په ګډون ۱۲۱ کسانو ته مرګژوبله اوښتې ده.
د بدخشان د امنیې قوماندانۍ مطبوعاتي دفتر په یوه اعلامیه کې ویلي چې د روان کال تېرو درېیو میاشتو کې د دغه ولایت په مرکز او ولسوالیو کې ۴۵ ترافیکي پېښې شوې دي.
سرچینه وایي چې دغو ترافیکي پېښو کې د ښځو او ماشومانو په ګډون ۴۶ کسان مړه او ۷۵ نور ټپیان شوي دي.
دغه راز د بدخشان اوسېدونکي وايي چې دغه ولایت کې ترافیکي پېښې نسبت پخوا ته ډېرې شوې دي.
د فیضاباد ښار یو اوسېدونکی عتیقالله وایي چې دغه ولایت کې ترافیکي پېښې د پخوا په پرتله ډېرې شوې دي.
هغه د ترافیکي پېښو د ډېرېدو لامل د موټرچلوونکو له خوا د ترافیکي قوانینو نه مراعتول او او د بېاسناد موټرو ډېرېدل بولي.
هغه له مسوولینو غواړي، داسې تدابیر دې ونیسي چې له مخې یې په دغه ولایت کې د ترافیکي پېښو له ډېرېدو مخنیوی وشي.
Views: 2
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن