فیضاباد (پژواک، ۱۸ چنګاښ ۱۴۰۳): د بدخشان روغتیايي مسوولین وایي، د دغه ولایت په مرکز فیضاباد ښار کې د ولایتي روغتون نسایي ولادي ۶۰ بستریز وارډ چې د نړۍوال روغتیایي سازمان له خوا تمولېده، خپل فعالیت درولی دی.
د بدخشان ولایتي روغتون رییس ډاکټر شفقالله همدرد پژواک خبري اژانس ته وویل، د نسایي ولادي ۶۰ بستریز وارډ فعالیت د روغتیا نړۍوال سازمان له خوا د بودجې نه ورکولو له امله درول شوی دی.
نوموړي وویل: «له اړوندو ادارو او ځایي مشرانو سره د دغه روغتیایي مرکز د فعالیت د دوام په موخه تر اوسه زموږ هڅې بې نتیجې پاتې دي.»
هغه وایي، په بدخشان کې د نسایي ولادي ۶۰ بستریز وارډ بندېدل به په دغه ولایت کې د میندو او ماشومانو د مړینو احتمال ډېر کړي.
د بدخشان ولایتي روغتون رییس وایي، دمګړۍ د دغه روغتون په ۳۰ بستریز وارډ کې په ۲۴ ساعتونو کې ۱۲۰ ناروغان تر روغتیایي مراقبت لاندې نیول کېږي چې په هر کټ کې څلور ناروغان بستر وي چې د هوا په ګرمېدو ناروغانو ته د ناروغیو سرایت موجود دی.
د هغه په خبره، د اسلامي امارت په بیا واکمنېدو سره د بدخشان ولایتي روغتون د ۶۰ بستریز وارډ بودجه د نړۍوال روغتیايي سازمان له خوا ورکول کېده، خو اوس د بودجې بندېدو له امله د دې برخې فعالیت له اتو ورځو راهیسې درول شوی دی.
د بدخشان د عامې روغتیا ریاست د ولایتي روغتون د ۶۰ بستریز وارډ د فعالیت درېدا تاییدوي، خو په دې اړه یې ډېر جزئیات ورنه کړل.
ورته مهال، ځينې سرچینې وایي چې درې میاشتې مخکې د بدخشان ۶۰ بستریز ولایتي روغتون درېیو متخصصینو استعفا ورکړې وه او اوس د دغه وارډ په بندېدو سره ۷۳ کارکوونکي بېکاره شوي دي.
Views: 31
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن