فېروزکوه (پژواک، ۱۹ چنګاښ ۱۴۰۳): غور کې امنیتي سرچینې وايي، د روان کال په لومړیو درېیو میاشتو کې د نشهيي توکو د تولید ۲۳۴ کارخونې له منځه وړل شوې، زرګونه کیلوګرام نشهيي توکي کشف او ترلاسه شوي او په تړاو یې ۲۰۹ کسان نیول شوي دي.
د غور د امنیې قوماندانۍ ویاند مولوي عبدالرحمن بدري پژواک خبري اژانس ته وویل: «د ۱۴۰۳ کال له پیل څخه د غبرګولي تر پایه پورې په بېلابېلو عملیاتو کې ګډو امنیتي ځواکونو، په ځانګړي توګه له نشهیي توکو سره د مبارزې ځواکونو دغه ولایت کې د نشهیي توکو د تولید له ۲۳۴ کارخونو ۴۲۷ کیلوګرام اېف، ۵،۳ کیلوګرام تریاک، ۸ زره او ۷۷ کیلوګرام اومان کشف او له منځه وړي دي.»
هغه زیاته کړه چې یاد توکي د دغه ولایت له مرکز او ولسوالیو ترلاسه او په تړاو یې ۲۰۹ کسان نیول شوي او ۸۷ فاینکوچ، لوکسل او سراچه ډوله موټرونه او موټرسایکلونه هم د امنیتي ځواکونو لاسته ورغلي دي.
نوموړي زیاته کړه چې د یاد ولایت د امنیې قوماندانۍ له نشهيي توکو سره د مبارزې ځواکونو په جلا عملیاتو کې ۵۰۰ جریب د کوکنارو کښت هم اړول شوی دی.
د غور د امنیې قوماندانۍ ویاند دغهراز وویل: «امنیتي ځواکونه د نشهيي توکو په پوره توګه له منځه وړلو پورې مبارزه کوي او له هغو کسانو سره چې سرغړونه کوي، قانوني چلند کېږي.»
ورته مهال د غور ځیني اوسېدونکي هم دغه ولایت کې له نشهیي توکو سره د مبارزې برخه کې د امنیتي ځواکونو له هڅو هرکلی کوي، وايي چې دغه ولایت کې په تېرو دوو کلونو کې د نشهيي توکو، په ځانګړي توګه د اومان کښت، تولید او قاچاق ډېر شوی او باید مخه یې ونیول شي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن