د لښکرګاه – کندهار لویې لارې د پراخولو او قیراچونې چارې پیل شوې

کابل (پژواک، ۲۱ چنګاښ ۱۴۰۳): د هلمند سیمه‌ییز مسوولین وایي، د څه باندې ۱۹ میلیون افغانیو په لګښت د لښکرګاه – کندهار لویې لارې د ۱۱ کیلومتره سړک د پراخولو او قیراچونې چارې پیل شوې.

د لښکرګاه ښاروال مولوي عبدالله روحاني پژواک خبري اژانس ته وویل چې دغه سړک د انکشافي بودجې په لګښت جوړېږي او چارې به یې په درېیو میاشتو کې بشپړې شي.

هغه وویل چې په دغه پروژه کې د یادې لویې لارې د ۱۱ کیلومتره سړک پراخول او قیراچول شامل دي چې ټولټال به پرې څه باندې ۱۹ میلیون افغانۍ لګښت راشي.

د لښکرګاه ښار یوه اوسېدونکي عبدالمحمد پژواک خبري اژانس ته وویل: «دغه سړک چې اوس په پاخه او اساسي ډول رغول کېږي، دا به زیات ګټور تمام شي، مخکې پر دغه سړک باندې زیاتې ترافیکي پېښې رامنځ ته کېدلې، اوس چې پراخه کېږي د هغه ترافیکي پېښو مخه به ونیول شي.»

د یادونې ده، درې ورځې مخکې هم په لښکرګاه ښار کې د درېیو میلیون افغانیو په لګښت د ویالو جوړولو چارې پیل شوې وې.

Views: 35